Shillong, K’Lyngkot 18: Ka kynhun ialehkai football ka Jylla Meghalaya kan hiar sha Silapathar ka Jylla Assam ha ka 19 tarik Kyllalyngkot ban pynkhreh ia ka jingialehkai ha ka Group B jong ka 79th Senior Men’s National Football Championship Santosh Trophy 2025-2026.
Ka Meghalaya kan ïalehkai ïa ka jingïakhun kaba nyngkong ha Upper Assam ha ka 22 tarik Kyllalyngkot pyrshah ïa ka Jylla Odisha.
Iaka kynhun ka Meghalaya hashuwa ban leit sha Assam, la wan khublei kitbok da President ka MFA Bah Hamletson Dohling haka jingdon lang kiwei ki dkhot ka MFA haka jingialang bala pynlong ha Madan Polo.
U Bah Khlain Pyrkhat Syiemlieh un bteng ban long u Coach jong ka kynhun kaba la mad bun tylli ki jingkylla naduh ba ka Meghalaya ka la jam naka preliminary ha u bnai ba la dep.
Khyndiat ngut ki rang ialehkai kin ym don lang haka kynhun namar ka jingiateh jingkular bad ki Club ne na kiwei kiwei ki daw hynrei ka kynhun ialehkai ka Jylla ka la ioh por bha ban pynkhreh hapoh ka jingpeit jong u Bah Pyrkhat.
Ka Assam, West Bengal, Tamil Nadu, Uttarakhand, Nagaland bad Rajasthan ki don lang haka Group A.
Ka Meghalaya, Odisha, Kerala, Services, Punjab bad ka Railways ki don ha Group B.
Ka Kerala ka la wan ba ar ha u snem ba la dep bad ka la ioh rah ia ka nam lahduh la bun sien, kaba khatduh ka dei ha u snem 2021-22.
Katba ka Services pat ka la jop dangshen ha u snem 2023-24 bad ja la pynliem ïa ka Meghalaya ha ka samoi ïalehkai ba la dep ha ka Quaterfinal.
Ka Punjab ka hap ban phai biang kham shadien ha ki por ba la dep namar ka sien ba khatduh baka jop kadei ha u 2007-08 hynrei ka la long kaba ar ha ki lai sien.
Ka la long ka jingap kaba kham slem shuh shuh na ka bynta ka Railways namar la dap 60 snem baka rah iaka nam lahduh hynrei ka la long kaba ar ha u snem 2013-14.
Ka Meghalaya bad ka Odisha kim pat ju jop ïa ka nam lahduh hynrei ka jingjop kaba bha tam jong ka Meghalaya haka jingialam u samla Pyrkhat, ka la wan ha u snem 2022-2023 ha kaba ka Meghalaya kala shah pynliem noh ha ka phainal da 3-2 ha ka Karnataka.
Saw tylli ki kynhun na kawei ka Group kin rung sha ka Quarter Final bad kata kan dei ka thong ba nyngkong jong ka Meghalaya.
Ka kynhun ïalehkai jong ka Meghalaya ka kynthup u Rajat Paul Lyngdoh, Banshanskhem Kharsyntiew, Nister Roy Suting, Wanboklang Lyngkhoi, Apborlang Kurbah, Wilbert D Marbaniang, Iohborlang L Lyngkhoi, Mebanaibok Kharbudnah, Richie Kharbani, Mebankhraw K Wahlang, Rimankhraw Kharumnuid, Riborlang L Lyngkhoi, Babysunday Marngar, Dibormi Kassar, Mebanshngain Kurkalang, Fairming Suting, Robertson M Khongriah, Hardy Cliff Nongbri, Kynsaibor Lhuid, Marbiangki Suchiang, Deibormame Tongper bad Dawanchwa C Challam.
Katba ki Support Staff ki kynthup Khlain Pyrkhat Syiemlieh (Head Coach), Sailon Syngkrem (Assistant Coach), Dious Lapasam (Manager) bad Wanbokstar Syiemiong (Physio).
