Shillong, Nohprah 18: Ka Meghalaya Footbal Association (MFA), hynne ka janmiet jong ka sngi Balang jong ka taiew, ka la pynbna ia ki kyrteng jong ki samla ialehkai phutbol, ban mihkhmat ia ka jylla sha ka lympung ialehkai kaban wan ka Senior Men’s National Football Championship for the Santosh Trophy 2025-26 preliminary round.
Ha ka jingpynbna ia ki kyrteng, ka MFA ka la pynbna syndon ia u nongialam ne kapten ka kynhun, kaba la jied ia u Hardy Cliff Nongbri bad u bah Khlain Pyrkhat Syiemlieh kum u coach.
Kumban shu pynpaw biang hangne, ba ha kane ka kynti, ia ka Meghalaya la pyniakap ha ka Group E kaban long hangne ha nongbah Shillong bad ki artylli ki jylla ba don lang ha kane ka group ki long ka Sikkim bad Arunachal Pradesh.
Ka jingiakhun ba nyngkong kan dei la 19 tarik ha kaba ka Meghalaya kan iakhun pyrshah ia ka Sikkim, katba ka Arunachal kan iakhun pyrshah ia ka Sikkim la 21 tarik bad ka Meghalaya pyrshah ia ka Arunachal kan dei la 23 tarik mynta u bnai.
Ia kine ki jingialehkai barpoh yn pynlong ha SSA Stadium, First Ground, Polo ha ka por 4 baje janmiet, ha kaba ki tiket na bynta kane ka jingiakhun yn die paidbah ia ki ha ki sngi ba don ki jingialehkai.
Haba kren bad u nongthoh khubor, u Hardy Cliff Nongbri u niew bad shim ba ka long ka burom kaba khraw tam ia ka jingim ka jong u ban shah jied kum u nongialam (kapten ) jong ka kynhun, ha kaba u la bynrap ba kum ka kynhun, mynta ka kynti, ka Meghalaya ka don ia ki rang ialehkai ba kynsai ryngkat u coach uiba tbit.
Katba na ka liang u bah Khlain Pyrkhat Syiemlieh haba batai halor ka jingjied ia u Hardy kum u kapten, u pynpaw ba ka jinglong nongialam bad ialehkai bha naka bynta ka kynhun ialehkai ka Nongkseh SS&CC, kidei ki nongmuna kiba la paka palat ban jied ia u Hardy kum u nongialam ha kane ka kynti kaba mynta ia ka kynhun.
Shuh shuh u bah Khlain u pynpaw ba ha kane ka kynti, ka MFA ka la la ioh por thmit palat ban pynkhreh ia la ka kynhun, hynrei wat la katta, la ialeh katba lah ban pynbiang tara bha ia kane ka kynhun bad u don ia ka jingsyhaniah ba ki player ba la jied bad pynbna ia ki hynne ka janmiet, ki ialehkai bha bad btin lynti ia ka jylla ban jam shakhmat ha kane ka lympung.
Kyrteng ki player:
Goalkeepers – Wanteilang Malngiang, Banshanskhem Kharsyntiew, Nister Roy Suting
Defenders – Wanboklang Lyngkhoi, Apborlang Kurbah, Wilbert D Marbaniang, Iohborlang L Lyngkhoi, Allen Camper L Nongbri, Arlangky Nongsiej, Mebankhraw K Wahlang
Midfielders – Hamedamanbha Wahlang, Riborlang L Lyngkhoi, Babysunday Marngar, Dibormi Kassar, Mebanshngain Kurkalang, Fairming Suting, Robertson M Khongriah, Hardy Cliff Nongbri, Kynsaibor Lhuid
Forwards – Shano Tariang, Deibormame Tongper, Dawanchwa C Challam
Support staff:
Khlain Pyrkhat Syiemlieh (Head Coach), Sailon Syngkrem (Assistant Coach), Dious Lapasam (Goalkeeping Coach), Cliff R Nongrum (Manager), Wanbokstar Syiemiong (Physio)
, hynne ka janmiet jong ka sngi Balang jong ka taiew, ka la pynbna ia ki kyrteng jong ki samla ialehkai phutbol, ban mihkhmat ia ka jylla sha ka lympung ialehkai kaban wan ka Senior Men’s National Football Championship for the Santosh Trophy 2025-26 preliminary round.){kind=link}