Shillong, Rymphang 01: Ka don ka khubor ba sngewsih haba sdang ia u bnai Rymphang namar ka kynhun ialehkai ka Meghalaya kala duh noh ia ka jaka ban rung sha ka Quarter phainal jong ka National Football Championship ka Santosh Trophy 2025-2026.
Ka lynti jong ka Meghalaya kala kut noh hadien ba ka kynhun Services ka la pynliem ia ka Kerala da 1-0 kol ha ka jingialehkai jong ka Group B ha Silapathar, Assam.
Ka jingjop jong ka Service ka mut ba kala knieh noh iaka kyrdan ba 4 naka Meghalaya ha kaba tang kiba don haka Top 4 na kawei ka Group kin jam shaka knockout round.
Baroh ar tylli ki kynhun kata ka Services bad Meghalaya ki la ioh mar 6 Points hadien ba ki la jop 1 sien, ïakhaid lai sien bad shah rem 1 sien hynrei ka Services ka don ïa ka jingïapher ka rukom thep Goal bad kata ka dei kaba la pynlong ïa ka Service ban rung sha Knockout Road.
Ka Services kam shym la lah ban lehkai bha haka Final Round hynrei kala lah pat ban jop haka jingialehkai ba khatduh.
Hynrei kane ka kynhun kaba wan ba ar ha u snem bala dep kala ioh rung lypa kaba ailad ia u coach u Shafeeq Hassan Madathil ban bujli ïa ki nongïalehkai ba sdang bad ban ailad ïa ki nongïalehkai ba shakhmat ban shongthait.
Kane ka la ailad iaka Services bad ka la ioh thep Goal ha ka minit kaba 18 lyngba u Abhishek Pawar, kaba la biang ban ioh khur 3 point.
Ka jingbym lah ban jam sha ka knockout round kan long kaba pynduh jingkyrmen ïa ka Meghalaya namar ki nongïalehkai bad ki nongkyrshan ki don ka jingkyrmen.
U coach u Bah Khlain Pyrkhat Syiemlieh u la ïalam ïa ka kynhun Meghalaya ban wan bar ar ha ka Santosh Trophy 2022-2023.
Hynrei ka Meghalaya ka la lah ban jam shaka Final Round haka jingialehkai ba long ha Shillong ha u bnai Nohprah namar ka kynhun ka ioh lad bha ban kilan met ban pyntbit ialade.
Ka Meghalaya kala pyntbit kham bha shwa ban leit sha Assam bad ki la sngewskhem watla ki don ha ka ‘Group of Death’ ba don ka kynhun Kerala, Services, Railways, Punjab bad Odisha.
Ka Meghalaya ka la sdang ïa ka Final Round da kaba jop ïa ka Odisha da 1-0 kol bud sa ar tylli ki jingïakhaid kata 3-3 pyrshah ïa ka Punjab bad 2-2 pyrshah ïa ka Services.
Ka jingshah rem ha ka Kerala, ki jingïakhaid lai sien bad ka jingjop da kaba rit goal pyrshah iaka Odisha ka la buh jingma iaka Meghalaya lypa iaka kynhun.
Watla ka kynhun ka la ai jingkyrmen ïa ki nongkyrshan ba ieid ïa ka phutbol jong ka Meghalaya hynrei ka dang don shibun ka kam ban leh shwa ba ka jylla kan lah ban ïakhun ïa ki ba tbit tam ha ka ri na ka bynta ka Santosh Trophy.
