Shillong, Jan 31: Ka Meghalaya kan hap ban ap haduh lashai ka sngi ban tip la kan ioh rung ne em sha ka Quarterfinal jong ka National Football Championship ka Santosh Trophy 2025-26 hadien ba ka jingiakhun kaba khatduh jongka kynhun ha ka Group B, kala kut da ka jingiakhaid kaba mar 2-2 kol pyrshah ia ka Railways ha Silapathar, Assam, hynne ka sngi.
Kane kadei ka sien kaba 3 ia ka Meghalaya ban iakhaid na ki 4 tylli ki jingiakhun.
Ka Meghalaya ka hap ban ap ia ka jingiakhun hapdeng ka Services bad ka Kerala, ia kaba la pynkynriah ban pynialehkai noh lashai ka sngi ha ka por mynstep. Tang 4 tylli ki kynhun ialehkai kin ioh rung na kawei ka Group ban rung sha kawei pat ka wat jong ka jingiakhun ha ka Knock Out.
Lada ka Services kaba la ioh 3 point, kan jop ia ka jingiakhun, kan pynlong ia ka Meghalaya kaba la kamai 6 point ban duh rung sha kawei pat ka wat. Ka Services ka kham biang ha kaba iadei bad ka jingioh thep kol bad kam pat shim la jop tang shisien ruh hynrei ka Kerela ka lah ban pynshong ia ki nongialehkai kiba tbit namar ba kala dep ban ioh rung lypa na ka Group B.
Ha ka jingiakhun hynne ka sngi, ka Punjab kala pynrem ia ka Odisha da 5-2 ban jam sha ka kyrdan kaba 3 bad ban tam syndon ia ka Meghalaya.
Ka jingiakhun hapdeng ka Meghalaya pyrshah ia ka Railways kala long kaba shongshit na ka bynta ki nongwan peitkai ia ka jingialehkai Football. Ka Meghalaya kala leh bakla da kaba kum thep ia ka bol sha la kol ha ka minit kaba 65 hynrei kala ioh ban pyniakhaid noh ha ka minit kaba 66 lyngba u Apborlang Kurbah (66′) bad ha ka minit kaba 73 u Mebankhraw Wahlang ula ioh thep ia ka kol ka baar na ka bynta ka Meghalaya.
Hynrei ka Railways kala bteng ban ialehkai bha bad kala ioh ban pyniakhaid lyngba ka jingioh thep kol u Johnson Joseph Mathews ha ka 75 minit bad haduh ba kut ka jingiakhun kine ki ar tylli ki kynhun kim shim la lah shuh ban thep kol bad ka jingiakhun kala kut noh ha ka jingiakhaid kaban pynlong ia ki ban ioh rung sha ka Quarter Final ryngkat bad ka Punjab bad Kerala.
U Coach ka Meghalaya u Bah Khlain Pyrkhat Syiemlieh ula pynmih bujli da 5 ngut ki nongialehkai mar ia sdang, hadien ba kane ka kynhun ha kine ki 2 sngi kiba la dep kala mad ia ka jingshah pynrem ha ka Kerela.
U Banshanskhem Kharsyntiew ula ioh ia ka kabu ban mih bujli ha ka jaka jong u Rajat Paul Lyngdoh, u Dibormi Kassar, u Babysunday Marngar bad u Dawanchwa C Challam kila ioh ban mih biang naduh nyngkong.
Ka jingkylla kaba khraw kadei ruh lyngba ka jingwanphai jongu Hardy Cliff Nongbri ban iakhun na ka kynhun ka Meghalaya hadien ba ula pyndep ia ka jingwan mihkhmat ia ka Nongkseh Sports Club. Watla ym shim la ioh por bha ban ia pynkhreh lang bad ka kynhun jong ka Meghalaya naduh ba la kut ka jingiakhun ha ka wat kaba nyngkong ha u Nohprah hynrei u Bah Syiemlieh ula sngew ba ka jingshemphang ka jongu, ka bor ban ialam bad ia ka jingtbit ban ialehkai shapdeng ka long kaba kongsn tam ia ka kynhun.
Kiwei pat ki nongialehkai kiba la shah pynshong ki kynthup ia u Fairming Suting, Mebanshngain Kurkalang, Robertson Khongriah bad u Marbiangki Suchiang.
