Shillong, Nailar 28: U Myntri Rangbah duh ka ri India Narendra Modi ula sam palat 51,000 tylli ki shithi thungkam sha ki samla ba iohkam lyngba ka Video Conferencing kum shi bynta ban rakhe iaka Rozgar Mela kaba la long ha 45 tylli ki jaka ha kylleng ka ri.
Lyngba kane ka Rozgar Mela, ka Tnat Kam pohiing jong ka Sorkar Pdeng ka la pynrung kam ha ki Central Armed Police Force (CAPF) bapher bapher kum ka Central Reserve Police Force (CRPF), Border Security Force (BSF), Shashtra Seema Bal (SSB), Assam Rifles, Central Industrial Security Force (CISF), Indo Tibetan Border Police (ITBP) bad Narcotics control Bureau (NCB) kumjuh ruh ka Tnat Pulit jong ka Delhi. Kiba shah thung kam thymmai, kidei kiba la jied na kylleng ka ri, bad kin iasoh bad ka kam ha ki kyrdan bapher bapher kum Constable (General Duty), Sub-Inspector (General Duty) bad ki Non–General Duty Cadre ha ki kynhun bapher bapher hapoh ka Tnat Kam Pohiing jong ka Sorkar Pdeng.
Ha ka jingai jingkren ha ka jingialang, u Myntri Rangbah duh u la ai khublei ia kiba shah thung kam thymmai na ka bynta ka jingshah jied jong ki kum ki ‘Amrit Rakshak’ ha ka Amrit Kaal. U la khot ia ki kum ki ‘Amrit Rakshak’ namar ym tangba kin ai jingshakri ia ka ri hynrei kin iada ruh ia ka ri bad ki briew jong ka. “Phi long ki ‘Amrit Rakshak’ jong kane ka ‘Amrit Kaal’”, la ong u Myntri Rangbah duh.
U Myntri Rangbah duh u la ban ba kane ka bynta jong ka Rozgar Mela ka jia ha ka por haba ka ri ka dap da ka jingsngewsarong bad ka jingskhem jingmut.
U la ong ba ka Chandrayaan 3 bad Pragyan Rover ki iai pyni ia ki dur ba thymmai jong u Bnai.
Ha kane ka por kaba kyrpang, u Myntri Rangbah duh u la ong ba kiba shah thung kam thymmai ki sdang ia ka jingiaid lynti ba kongsan tam jong ki ha ka jingim bad kitbok kitrwiang ia baroh kiba shah thung kam thymmai bad kiba haiing jong ki.
U Myntri Rangbah duh u la ban jur ia ka jingkitkhlieh kaba wan bad ka jingshah jied ha ka kam iada ri lane jingshngain bad ki kynhun pulit bad ong ba ka Sorkar ka la shimkhia bha ha kaba iadei bad ki jingdonkam jong ki kynhun shipai. U la kdew ia ki jingkylla kiba khraw ha ka jingpynrung kam ha ki kynhun paramilitary. Ka rukom pynrung kam ka la long kaba sted naduh ka jingthep haduh ka jingjied ba khatduh, la pynlong ia ki eksamin ha ki ktien tynrai.
U la pyntip ruh shaphang ka bhah ba kyrpang na ka bynta ki samla na ka thain khappud bad ki jaka ba shah ktah ha ki kam jong ki lehnoh.
U Myntri Khynnah jong ka Sorkar Pdeng ba dei khmih ia ka Tnat Micro Small and Medium Enterprises (MSME), u Bhanu Pratap Singh Verma u la iashim bynta ha ka Rozgar Mela ba la pynlong ha Headquarters jong ka Directorate General of Assam Rifles ha Laitkor, Shillong ha kaba u la sam ia ki shithi thung kam sha kiba shah thung kam thymmai hadien ka jingai jingkren jong u Myntri Rangbah duh. 218 ngut kiba shah thung kam thymmai ki la ioh ia ki shithi thung kam jong ki ha ka bynta kaba 8 jong ka Rozgar Mela ba la long ha nongbah Shillong mynta ka sngi.
Haba pynpaw ka jingsngewkmen jong u na ka bynta ka jingjop ka jingpynlong ia ka Rozgar Mela, u Myntri Khynnah jong ka Sorkar Pdeng u la ong ba ka kam ka dang iaid shaphrang ban ai 10 lak tylli ki kam sorkar sha ki samla ha ki tnat bapher bapher jong ka sorkar pdeng.
Kane kalong ka sienjam kaba kongsan ban pynurlong ia ki jingkut jingmut jong u Myntri Rangbah duh, u Narendra Modi ban pynthikna ki lad ioh kam na ka bynta ki samla khlem ka jingiashah shiliang bad jingbamsap. U Myntri u la iaroh ruh ia ki sienjam ba la wanrah da ka sorkar ban plie lad ia ki samla ban iakhun ia ki eksamin pynrung kam ha ki ktien tynrai.
Ula ong ba kane ka sienjam kan iarap ia ki samla na ki bynta bapher bapher jong ka ri ban ialeh ia ki eksamin namar ia ki eksamin la pynlong ha 13 tylli ki ktien tynrai ha ka jaka ka ktien Phareng lane Hindi kumba ju long mynshuwa.
