Shillong, Rymphang 12 : U Myntri Rangbah Duh ka Ri Narendra Modi, hynne ka sngi Nyngkong, ula sam ia palat 1 lak tylli ki shithi thungkam sha ki briew ba dang pynrungkam thymmai lyngba ka video conferencing.
U Myntri Rangbah Duh ula buh mawnongrim ruh ia ka phase-I jong ka Integrated Complex “Karmayogi Bhavan” ha New Delhi.
Haba ai jingkren, u Myntri Rangbah Duh ula ong ba ia kine ki shithi thungkam la aiti sha palat 1 lak ngut kiba dang iohkam thymmai bad ai khublei ia ki lem bad ia ka iing ka sem ha kane ka sngi ba kmen. Ula kren halor ka campaign kaba dang iaid shaid shaid ban ai ka lad iohkam sha ki samla ha ki Tnad treikam ka Sorkar India.
Ka jingthungkam haba shai
Haba kdew ba ka jingslem hapdeng ka jingpynmih ia ka khubor laitlam bad ka jingaiti ia ki shithi thungkam ka lam sha ka jingiathong pisa, u Myntri Rangbah Duh ula ong ba kane ka Sorkar ba mynta kala pynlong iakane ka rukom thungkam kaba shai haba pyndep ruh ia ka jingthungkam ha ka por kaba lyngkot.
Ula ong ba kane kala ailad ia baroh ki samla ba kin pyni ia ka jinglah jong ki. “Mynta ka sngi, man ki samla ki ngeit ba ki lah ban ioh ia ki kam Sorkar da ka jingtrei shitom bad ka jingdon sap” ong u Modi haba pynpaw ba ka Sorkar ka thrang ban pynlong ia ki samla kum ki paralok ba iatreilang ha ka roi ka par jong ka Ri.
Ula pyntip ba kane ka Sorkar ha mynta kala dep ban sam shithi thungkam ba palat ia ka 1.5 shah sha ki samla tang ha kine ki 10 snem bala leit noh haba ianujor bad ki Sorkar bala leit noh.
Ka solar rooftop kan nang thaw kam
Haba kren halor ka jingsdang ia ka lad treikam ba thymmai bad ka jingnang plie ia ka lad ban aikam aijam ia ki samla na ka jingtrei shitom ka Sorkar, u Myntri Rangbah Duh ula kren halor ka jingpynbna jong ka mang tyngka ba palat 1 klur tylli ki rooftop solar plant (pyndait tiar solar ha tnum iing) yn pyndait ha ki Iing briew ka ban iarap ban pynduna ia ka jingsiew bai bording bad plie ka lad ban kamai pisa da kaba die ia ka bording sha ka grid. Kane ka skhim kan aikam haduh 1 lak tylli, ula ong.
Ka jingkiew ha ki lad pyniasoh
Haba kren halor ka jingpoi ki lad pyniasoh sha ki kyndong kynshrot ka ri, u Myntri Rangbah Duh ula pynpaw ia ka jingmih ki iew thymmai, ka jingnang iar ka kam jngohkai, ka jingmih ki kam thymmai bad ka jingaikam ia 1 lak ngut namar ka jing nang khlain ki lad pyniasoh. “Ka jingkynshew ha ki jingtei kala nang heh ban lah pynsted ia ka roi ka par” ong u Myntri Rangbah Duh haba pyntip b aka Sorkar kala buh ia ka mang tyngka ba T.11 lak klur ban kynshew ia ki jingtei bapher bapher ba kynthup ia ki lynti rel, ki surok, ki kad liengsuin bad kiwei kiwei.
