Shillong, Lber 12 : U Myntri Rangbah ka Jylla Conrad K Sangma, hynne ka sngi Ba-ar, ula sam ia ka song pisa ba T.15 klur sha ki nongioh jingmyntoi na ka CM-Elevate lem bad ki shithi pyllait song pisa (sanction letter) jong ka Meghalaya Floriculture Mission kaba la mang haduh T. 240 klur.
Ia kine ki song pisa la sam ha ka CM Elevate Conclave 2024 kaba long ha U Soso Tham Auditorium, Shillong ha ka jingia don lang ka Myntri ka rep ka riang Dr M Ampareen Lyngdoh, ka MLA ka Saipung-Sutnga Kong Santa Mary Shylla bad kiwei kiwei.
Haba ai jingbatai halor ka CM Elevate Program, u Myntri Rangbah ula ong ba ka Sorkar kala treikam da ka mishon ban btin lynti ia ka Meghalaya ba kan long kawei na ki 10 tylli ki Jylla ba hakhlieh duh hapoh ka Ri.
“Ngi la sdang da ka mishon ban kynjoh ia ka Top 10 state, ban gin jam shakhmat da ka thong ban kynjoh pat ia ka 10 billion UD dollar economy bad bynrap ia 10 tylli ki kabu bad ithuh ia 10 tylli ki sector ki ban long ki nongniah ia ka kali jong ka roi ka par ha Jylla” ula ong.
Ula ong ba ka thong jong ka CM Elevate ka long ban kyrshan ia ki samla ba kin long ki nongsengkam lajong bad ban long ruh ki nongaikam aijam.
Ula pyntip ba ki don haduh 1254 ngut ki nongioh jingmyntoi na kane ka prokram ka ban kot haduh T. 56 klur bad ka ban aikam aijam haduh 50,000 ngut.
Haba pyllait ia ka Meghalaya Floriculture Mission ha kane ka jingialang, u Myntri Rangbah ula pyntip ba ha ka jingsdang jong kane ka mission, 3100 ngut ki briew kin ioh jingmyntoi ha ka jingmang tyngka ba kot T. 240 klur ha kine ki lai snem. Ka mishon ka long ban pynlong ia ka Meghalaya kum ka floriculture hub.
Handed over the appointment letters to the Village Data Volunteer, whose role will be to report to the Government on concerns from the grassroots. They have been engaged to be Government’s eyes and ears from every village of Meghalaya. pic.twitter.com/yEKfWHtcdt
— Conrad K Sangma (@SangmaConrad) March 12, 2024
Ha kane ka sngi, u Myntri Rangbah bad ki kynrem ki lyndan kila sam ia ka cheque bad ki sanction letter sha ki nongioh jingmyntoi naka Prime Agriculture Response Vehicles, Piggery Development, Poultry Farming, Goat Farming, Common Facility Centre, Agriculture Warehouse schemes kiba hap hapoh ka CM Elevate program bad ka Meghalaya Floriculture Mission.
U Myntri Rangbah ula pyllait paidbah ruh ia ka Mission Document jong Meghalaya State Floriculture Mission bad ka Meghalaya GDP Vision 2028.
