Ampati, Lber 07 : U Myntri Rangbah ka Jylla Conrad K Sangma ha ka sngi Saitjain, ula sam ia ka jingiarap song pisa sha ki nongioh jingmyntoi hapoh ka skhim FOCUS+ bad Green Meghalaya + scheme ha ka jingialang bala pynlong da ki bor District ka South West Garo Hills ha madan student ha Ampati.
Haba kren ha ka jingialang, u Conrad ula ong ba ka FOCUS+, bala pynlait ha u bnai Naitung 2022, ka ai ia ka jingiarap song pisa ba T.5000 shisnem sha ki longiing kiba pynmih marrep ba kin pynkhlain ia ka ioh ka kot. Kat kum kane ka skhim, la pyntreikam ia ka rule “Uwei u nongioh jingmyntoi na kawei ka longiing” khnang ban pynthikna ia ka jingleh hok bad tehlakam ia ka jingleh thok.
U iathuh ba ha ka por ba sdang ha u snem 2022-23, kumba 1,50,662 ngut ki nongioh jingmyntoi kila ioh ia ka song pisa ba T.75.33 klur. Hadien bala leh ia ki kam pynshisha lyngba ka Meghalaya One Portam, 93,285 ngut ki nongioh jingmyntoi la pynthikna ba ki dei ban ioh, katba kito kiba la kyntait la shah biang ba kin aplai thymmai.
Jong u snem 2024-25, ka Sorkar kala sdang ban pynlait ia ka bynta ba nyngkong ba T.2,500 sha ki 93,285 ngut ki nongioh jingmyntoi bad 11,133 ki longiing ba dang shu pynshisha thymmai na ri-lum Garo, kaba pynkot baroh lang ia ki longiing ba kyrshan hapoh ka FOCUS+ sha ka 1,04,418 ngut. Haduh mynta T.148.08 klur lah dep ban sam na kane ka skhim.
Ha ri-lum Garo, ka song pisa ba mynta kan pynmyntoi ia 81,046 tylli ki longiing, kynthup ia 11,133 ngut ki nongioh jingmyntoi ba thymmai, ha kaba T.20.26 klur lah pynlait sha baroh san tylli ki District. Ha South Garo Hills, haduh 14,017 ngut ki nongioh jingmyntoi kin ioh T.3.50 klur.
Haba kren halor ka Green Meghalaya +, u Myntri Rangbah ula iathuh ba kane ka prokram ka ai T.10,000 haduh T.20,000 ha ka shi hectare sha ki trai khlaw bad ki shnong hapoh ka Payment for Ecosystem Services (PES), ban pynshlur ia ka jingsumar ia ki khlaw ki btap.
U Conrad ula ong ba ka Meghalaya ka don jan kumba 17000 sqkm ki jaka khlaw bad ka Sorkar ka thmu ban pynneh pynsah ia shi lak hectare hapoh ka prokram. Ia mynta, palat 2800 ngut ki nongioh jingmyntoi kila sumar ia ki khlaw ha ka jaka bah eh jan 40,000 hectare.
Ka song pisa ba T.77.21 klur baroh lang, lah dep ban sam hapoh ka Green Meghalaya + kynthup ia T.34.73 ha ri-lum Garo katba T.48 klur yn sa pynlait sha ki nongioh jingmyntoi ha ka bynta ba mynta.
Kiwei pat kiba la ai jingkren ki kynthup ia u MLA ka Rangsakona Subor M Marak bad kiba iadonlang ki kynthup ia u MLA ka Salmanpara Ian Botham K Sangma, MLA ka Mahendraganj Sanjay A Sangma bad kiwei kiwei.
