Shillong, Nailur 23 : U Myntri Rangbah ka jylla, Conrad K Sangma ha ka sngi Thohdieng u la sam haduh 2000 tylli ki sniang sha ki 500 ngut ki nongioh jingmyntoi na ka skhim PROGRESS, kaba dei ka skhim jong ka sorkar jylla lyngba ka Rural Backyard Piggery Scheme.
Ha kane ka jingialang kaba long ha Raksamgre ba la pynlong na ka bynta ban rakhe ia ka jingjop ka prokram jong ki nongrep kaba tip kum ka FOCUSS bad ruh ban pynbteng sa ia ka FOCUS + hapoh Raksamgre Sub-Division ha West Garo Hills, u Myntri Rangbah ryngkat bad ki kynrem ki lyndan ki la sam ruh ia ki khun sniang sha ki nongioh jingmyntoi, nangta ka cheque sha ki Producer Groups bad ruh ka FOCUSS + Card.
Ha kane kajuh ka sngi u Myntri Rangbah u la sam ruh ia ki song pisa sha ki kynhun seng samla lyngba ka “YESS Meghalaya” programme.
U Myntri Rangbah u la ong ba lyngba ka FOCUSS bad FOCUSS + ka sorkar ka buh ka thong ban poi lut sha baroh ki nongrep ha nongkyndong kiba don ha ka jylla. U pyntip ruh ba lyngba ki prokram ba ha rukom, ki nongrep ki la lah ban plie ia ka lad ba kin ioh pura ia ki jingmyntoi na ka bynta ban pyntikna ban kyntiew ia ka kamai kajih kaba tikna.
U Myntri Rangbah u la pyntip ruh ba ha ki shisnem shiteng ki la don haduh 25000 tylli ki Producer Groups (PGs) kiba la thaw ha ka jylla hapoh ka FOCUS bad kumba 125 klur tam la dep ban pyllait sha kitei ki kynhun.
Haba pynshai ia ka jingsngewthuh bakla ba ka pisa ba ai sha kitei ki kynhun kadei ka ram, u Myntri Rangbah u la ong ba katei kadei beit tang ka jingkyrshan pisa na ka bynta ban kyntiew ia ka kam rep ne kino kino ki kam kiba ia dei bynta bad ka.
Lyngba ka FOCUSS, u Conrad u la sam ruh ia ka cheque kaba 33.90 lak tyngka sha ki farmer producer group bad don ruh ki riewshimet kiba la ioh lang lyngba ka FOCUSS +. Lyngba kitei baroh ar tylli ki prokram jong ka sorkar ki longiing kin ioh jingyntoi haduh 10,000 tyngka.
U Myntri Rangbah u la buh ruh ia u mawnongrim na ka bynta ban tei ia ka ophis treikam kaba thymmai jong ka Raksamgre Civil Sub-Division, kaban tei ha ka jinglut kaba kot sha ka 4klur tyngka. U ong ruh ba ka jingtei ia katei ka ophis ba thymmai kan pyntikna ba ka civil sub-division kan lah ban treikam kham bha bad ai ruh ka jingshakri kaba paka.
Ha kajuh ka sngi u la leit ruh ban plie ia ki ar tylli ki iing skul ba thymmai kiba hap ha Raksamgre Civil Sub-Division ba la tei lyngba ka Asian Development Bank’s Supporting Human Capital Development Projects ha Meghalaya. Kitei ki skul ki kynthup ia ka Pedaldoba Govt Aided Secondary School bad ka Raksamgre Higher Secondary School.
