Nongstoin, Jymmang 17: Ka Auxilium Roilang Institute for Sustainable Empowerment, Pyndengrei, Nongstoiñ hynne ka sngi Thohdieng, kala sam ïa ki kor suhjaiñ sha ki 22 ngut ki samla bad Longkmie, kiba la dep ïa ka jinghikai pyntbit ban suhjain nalor ka syrnod bala ithuh da ka Radiant Infonet, New Delhi.
Kane ka jingai jinghikai ka dei kaba la bei tyngka da ka Meghalaya State Skills Development Society kaba treikam hapoh ka jingkhmih ka Tnad Labour ka Jylla.
Kane ka jingsam kor bad syrnod ka dei ka sien kaba ar bala pynlong da katei ka shlem ai jinghikai.
Ha kane ka jingïalang ba la pynlong haka Hall jong ka ARSTC Nongstoiñ, Pyndengrei u bah Ferdy Bert Wanbah Assistant Director ka Cottage & Industry, u la long kum u kongsan bad ka kong Memorial Khongkai Skills Development Officer West Khasi Hills District kum ka symbud kongsan ha ryngkat ka jingïadonlang ki sister, ki brother bad ki riewrangbah jong ka shnong Pyndengrei bad kiwei kiwei.
U bah Ferdy Bert Wanbah haba ai jingkren u la ong ba ka jingnang ïa ka kam, ym dei ban shu kut noh tang ha kane ka jingshah hikai hynrei dei ban sdang ban ïeng hala ki kjat bad ban pan jingmut na ki nonghikai kiba lah hikai.
Haba ai jingkren ka kong Memorial Khongkai Skills Development Officer West Khasi Hills District ka la ong wat buh pynsarang ïa ki sap bad ïa ki tiar ki tar kiba la ïoh na katei ka shlem jinghikai hynrei hap ban nang ban ïeng ha la ki kjat ban kamai jakpoh.
