Nongstoiñ, Risaw 30: Ka Khasi Students Union Rambrai Circle ha ka 29 tarik mynta u bnai, ka la sam ia ka khusnam Maitshaphrang Award kaba ar, sha ki 10 ngut ki samla pule kiba la wan shakhmat ha ka eksamin SSLC 2022.
Ïa kane ka jingsam khusnam la pynlong ha Vani Hall St John Bosco Secondary School, Nongkroh Rambrai bad ïa katei ka jingïalang la pynïaid da u Samla Dankobartis Nongphud General Secretary KSU Rambrai Circle.
Kiba ïadon ryngkat ha kane ka jingialang ki kynthup naduh ki Nonghikai, ki khynnah skul jong ki saw tylli ki skul ki hap hapoh jong ka Rambrai, u Rev Fr. John Kharshandi, u Syiem ka Hima Rambrai ha ryngkat ki Nongïalam jong ka KSU West Khasi Hills District Unit, kiba kynthup naduh u samla Willbest Wanniang Education Secretary KSU West Khasi Hills District Unit, bad kiwei kiwei.
U samla Franklinroy Syiemiong General Secretary KSU West Khasi Hills District, u ba long u kongsan, u la ong ba dei ka seng KSU kaba nyngkong eh ban sam ïa ka khusnam sha ki samla pule ba wan shakhmat kum ka jingpynshlur bad ai mynsiem ïa ki paradoh parasnam ba kin nang kiew shakhmat.
U la ong ba ka jingai ïa ki momento ka dei tang ka dak hynrei kaba kongsan ka dei ka mynsiem ba ka KSU ka pyrsad na ka bynta ki samla pule, ba kin nang ïai trei shitom ha ki bynta kiba dang sah. U la ai mynsiem ruh ïa ki samla pule ba kin nangïai kiew shaphrang bad kumjuh ruh ïa ki dkhot jong ka seng ba kin nangtei ïa kaba mynta bad pynkhreh ïa ka la shai.
