Shillong, Rymphang 26: Ka Khun Hynniewtrep National Awakening Movement (KHNAM) ka la dawa ia ka Khasi Hills Autonomous District Council (KHADC) ba ka dei ban pynlong kongsan ia ki utilization certificate (UCs) na ka bynta ki grant ba iadei bad ka pule puthi, da kaba maham ruh ba lada ym pyndonkam iaki UC ka lah ban don ka jingpyndonkam bakla ia ka pisa.
Ha ka shithi sha u CEM ka KHADC Winston Tony Lyngdoh, u Working President ka KHNAM Bah Thomas Passah u la kdew ia ka jubab jong ka RTI kaba pyni ba ka council ka la ai jingiarap haduh T.86.04 lak sha ki jaka pule ha ki san snem ba la dep kata T.22.68 lak ha u snem 2019-2020, T.20.16 lak ha u 2020-21, T.18.72 lak ha u 2021-22, khlem ai pisa ha u 2022-23, bad mar T.12.24 lakh ha u snem 2023-24 bad 2024-25.
Hynrei ha ka RTI, la kdew ba ka KHADC kam pynbor ba dei ban aiti ïa ki UC.
“Ka jingdonkam ban aiti iaki UC ka long ban pynthikna ba ïa ka pisa paidbah la pyndonkam hok bad haba khuid haba shai. Ka jingbym pynbor ban pynbiang UC ka plie lad ïa ka jingpyndonkam bakla, kaba long pyrshah ïa ka jingmut jong ka jingsynshar kaba khuid” la ong u Bah Thomas.
U Bah Thomas u la kynthoh ba namar ba la pynlut T.86.04 lak ha ki jingai jingiarap lyngba ki Grant, ka long kaba kongsan ban tip kumno la pynlut ia ka pisa.
“Ngi ban jur ba dei ban pynlong ba ki UC kidei kiba kongsan (Mandatory) ban pynduhjait ïa ki kam bamsap bad ban pynthikna ïa ka jingsynshar kaba khuid,” u la ong da kaba kyntu ïa ka KHADC ban pyntip sha ka seng ïa ka rai jong ka na ka bynta ka jingmyntoi paidbah.
