Shillong, Risaw 20 : Ka Ophis ka District Tuberculosis Officer ka East Khasi Hills hynne ka sngi palei, kala pynlong ia ka “Food Distribution Support Scheme” ne ka skhim sam jingbam sha ki nongpang TB ha Social Service Centre, Bishop House, Laitumkhrah.
Haduh 22 ngut ki nongpang TB kila ioh ia kine ki jingbam tei met bad ki marbam. Iakine ki marbam la ju sam sha ki nongpang shisien ha ka shibnai. Ka East Khasi Hills ka dei kaba don bun ngut ki nongpang TB kaba kot haduh 1300 ngut.
Ha kane ka jingialang, u Dr Jennifer Kharwanlang ila kyntu ia ki nongpang kiba wan sha ka jingialang ba kin long ki nongjop ia ka jingpang TB bad ban pynsaphriang ruh ia ka khubor sha kiwei kiba kiar ban wan shakhmat.
Ila ong ba ka jingdih dawai ia ka jingpang TB ka dei hynriew bnai bad haba ki nongpang kim pep ban dih wat tang shisngi, kin hap ban sdang biang naduh kaba sdang. I Dr Jennefer ila ban jur halor ka jingdonkam ban bam ia ki jingbam ba tei met.
I Kong Annabella Nongrum, Kmie jong uwei na ki nongpang TB, ila ai ka jingbatai ba kumno u Khun jong I, ila ioh pat ia ka jingkoit na ka jingpang TB bad katno I sngewnguh ia ki Doktor bad ia ka Social Service Centre halor ka jingiarap.
