SHILLONG, JUL 28: U Symbud Myntri Rangbah ka Jylla bad National Vice President ka NPP Bah Sniawbhalang Dhar ula ong, ba ka Meghalaya kala sakhi ia ka jingkiew kynsan hapoh ka sorkar kaba la ialam da ka NPP, ha kaba ka mang tyngka jong ka jylla kala tam ia ka T.30,000 Klur bad ki projek ka Sorkar Pdeng kala palat ia ka T.42,000 klur bala bhah ha kine ki 8 snem kiba la leit.
Haba kren ha ka jingialang ialap elekshon na ka bynta u kyrtong ka NPP uba iakhun ia ka Elekshon shiteng samoi jong ka MP Lok Sabha u Dr DRL Nonglait ha Umdihar, Umsning ha Ri Bhoi, u Bah Dhar ula ong, ba kane ka jingkylla kadei kaba la iohi ha kaba iadei bad ki surok, ka koit ka khiah, ka pule puthi, kam ialehkai bad kam jngohkai.
“Hashwa u snem 2018, ngi ngim ju iohsngew ia ka jingkhot tender ia ki surok kaban kot ia ki spah klur. Mynta phi iohi ia ki hajar klur namar ba ka Sorkar India kala bhah tyngka kum ka dak ban burom ia ka sorkar ka jong ngi” ong u Bah Dhar.
Ula pynpaw ba u Myntri ka Sorkar Pdeng u Nitin Gadkari dang shen ula buh mawnongrim ban tei ia ka projek kaba T.3,000 Klur bad pynbna ruh sa ia ka T.39,000 Klur na ka bynta ka jylla.
U Bah Dhar ula pynpaw ba 7-8 ngut ki myntri ka sorkar pdeng kila wan jngoh ia ka Shillong ha kine ki 10-15 sngi kiba lah dep, ban lum ia ki jingilang bna bishar kam ia ka thain shatei lammihngi bad kila ioh ia ki jingpynsngew ba ka “Meghalaya kadei kawei na ki jylla kaba la pyndonkam thikna bha ia ka bhah tyngka jong ka Sorkar Pdeng.”
Ha kaba iadei bad ka mang tyngka jong ka jylla, ula ong “Ha u snem 2018 haba ngi lah thaw ia ka MDA-I, ka Mang Tyngka kala long tang T.9,000 Klur. Mynta kala palat ia ka T.30,000 Klur. Kane ka lah jia namar ba ka sorkar kala leh ia kaei kaba kadei ban leh”.
Haba pynpaw ia ki jingkiew ka roi ka par, u Bah Dhar ula ong ba ka sorkar kala pynleit jingmut palat ban ia ki surok. Ha ka kam ialehkai, ka Meghalaya kan ioh ia bun ki madan artificial ban ialehkai football ha ka ri bad ia ka stadium kaba heh tam ha ri India kaba dang tei ha Mawkhanu ha ka jinglut kaba kot T.700 Klur.
Ha ka kam jngohkai, ka Mang Tyngka kala kiew na ka T. 40-50 Klur shwa u snem 2018 sha ki hajar klur man la ka snem. Ki Homestay kila roi na ka 500 sha ka jingbuh ia ka thong kaban kot sha ki 5000 tylli ha kaba ka sorkar kan ai jingkyrshan da ka Subsidy.
Ula ong, kumba 7,000-7,500 ki kali ki wan rung sha Shillong man la ka sngi ha kaba la antad ba kan wanrah kumba T.1,100 Klur ha ka kam jngohkai man la ka snem.
Ula iada ruh ia ka jingshim rai ka sorkar ban pyntreikam ia ka jingsiew tulop kaba thymmai ia kumba 23,000 ngut ki nonghikai bad ong ba kadei kaba eh bha hynrei ka rai kaba donkam pat, ban pynkut noh ia ki snem jong ka jingiehbein.
“Ngi ngim pynleit jingmut tang ha ki surok. Ngi lah pynleit jingmut ha ki samla ki jong ngi, ka koit ka khiah, pule puthi bad kam jngohkai. Ka Meghalaya kala iaid ha ka lynti kaba dei” la bynrap u Bah Dhar.
