Sait khuid u Myntri ba kam don kam bamsap ha ka jingpyntrei ia ka JJM ha Jylla

Shillong, Iaiong 24 : U Myntri ka Tnad Public Health Engineering (PHE) Marcuise N Marak ha ka sngi Palei, ula ong ba kam don satia kano kano ka jingbamsap ha ka jingpyntreikam ia ka skhim Jal Jeevan Mission (JJM) hapoh ka Jylla.

U Marak ula niew ruh ia ka jingkynnoh jong u MLA ka AITC na Rajabala Dr Mizanur Rahman Kazi kum ka “jingsngewthuh bakla” bad ong “Ki kam ki dang iaid shaid shaid ia baroh ki project ba dang pyntrei”.

“Ki jingkynnoh bamsap ki don. Hynrei ka rukom pyntrei ia ka JJM ka long ba shisien bala pyndep ia ka kam, ka don ka kynhun mamla ba lai (third party) kaba jurip bad ai jingmut ban siew ia ka pisa bad dei tang hadien kane ba ka Sorkar kan sa iaid shakhmat bad siew ia ki contractor. Kumta, kam don satia kano kano ka lad ban iabamsap” ula bynrap.

Hynreiu Myntri ula pynpaw ba ka JJM kala mad ia ka jingtynjuh kaba khraw bha namar ka jingring tyrkhong jong ki tyllong um.

“Ngi la iaksaid bad kane ka kam (jingtyrkhong ki tyllong um) kiba la dep pynpaw ha ka thup jong ki tyllong um ba don jingma” ula ong haba kular ba ka Sorkar kala pyrshang katba lah ban leh eiei halor kane ka bynta.

Haba kren shuh shuh halor ki jingeh bala mad da ka Tnad, u Marak ula ong “Ynda mih ka kam jong ka Treatment Plant, khlem pep kan dei ha ki jaka briew kumta ngi hap ban iasyllok bad ia ki trai jaka bad lada ki trai jaka kim mynjur bad ka Tnad lane contractor, kumta ka kam ka slem noh. Namar kata, ban pynkohnguh ia ki trai jaka ka shimpor bha. Ki don ki jingeh haba phai sha ki khlaw. Ngi donkam ia ka NOC na ka Tnad Frest bad ia kane ruh ngi hap iaksaid bha. Ki don da ki kyndon ba ngi hap leit sha ka Tnad Forest ban ioh NoC. Ki don katto katne ki kam kiba ngi la sahkut lem kumta baroh ki project kila iaid kat kum ka por bala buh”.

Ha kajuh ka por, u Myntri u pyntip ba ka Jylla kala ioh ia ka por ban pyndep ia ka JJM hapoh u snem 2028. “Ngin pyrshang ban pyndep ia ki ha kane ka por bala buh” ula kular.