Shillong, Risaw 29 : Haduh katno ka Sorkar Jylla kan lah ban bei tyngka ban shna pynheh ia ka kad liengsuin Shillong Airport? ka jingkylli ka mih namar ka jinghap thied jaka kaba la rem dor lypa nalor ka jinghap siew ia ki jingtei (Iing/dukan ter ter) ki ban hap pynpra namar kane ka project.
Ka Sorkar Jylla dang shen, kala pynbna ba kan thied jaka biang sa 16-17 acre ha ka thain Umroi ban shna pynheh ia ka kad liengsion Shillong Airport-khnang ban pynlong ia kane ka Kad kaba lah ban wan hiar ki liengsuin kiba heh.
Kane ka jingpynbna ka wan kum ka khubor kaba bha bad ba sngewtynnad ia ki paidbah ka Jylla kiba la apkhmih lynti la slem ban ioh ia ka lad pyniasoh kaba biang tam lyngba kane ka kad liengsuin, ka ban pynsuk ia ka leit ka wan bad pyniasoh ia ka Jylla bad kiwei ki Sorbah ka Ri nalor ban kyntiew ruh ia ka Jylla ha kiba bun ki liang.
Lehse kane ka jingpynbna kan nym long pat ka khubor kaba sngewtynnad ia ka Sorkar Jylla kaba hap ban bei tyngka nalade ban pynlut ia ka bailut baisep ha ka jingthied jaka na ka bynta kane ka project. Ka jingpynbeit ka long ba ka Airport Authority of India (AAI) kan pynlut ia ka project ban pynheh ia ka kad katba ka Sorkar kan pynlut ha kaban thied ia ka jaka.
Kane ka long namar ka Sorkar mynta kan hap ban buria ar-shah lai-shah ia kaei kaba ka dei ban pynlut namar ka jingnang stad u paidbah kumno ban kamai pisa bad ban khlong ia ka pla tyngka ka Sorkar.
Balei ba ong ia kane?. Leit sha Umden Arka bad Umden Mission, kiba dei ki shnong ba hap shim jaka ka Sorkar ban pynheh ia ka kad liengsuin bad phin sa iohi dala ki jong ki khmat – Kaei kaba ka Sorkar kan leh – kumno kan leh – haduh katno shuh kan hap buria?.
Kine ki artylli ki Shnong kiba don markhap ka Umrynjah, kiba dang hap ha Umroi constituency, kila sakhi ia ka jingkylla kaba khraw ha kine ki khyndiat taiew bala leit noh bad kane ka jingkylla ka dei ka jingmih ki iing thymmai la kum ki tit ha baroh ki jaka ba lait nalor ki jingtei pynheh ia ki iingrim, kiba la tei da ki iingmaw bad ki iing paki dulan.
‘Ki trai jaka ne trai iing’ ki lah ban leh kat kaba mon iala ka jong – ki don ka hok ka bym don ba lah ban tuklar ne lah ban buh jingkylli. Ki ieh shrah ne tei jingtei ha ki jaka lajong ka dei ka mon bad ka hok jong ki. Hynrei kaba iphylla ka long ba dei tang mar syn pynbna ka Sorkar ban thied jaka, jriang mih ki jingtei ha baroh ki jaka ba ju iehshrah baroh shikatta.
Haba iakren bad ki katto katne ki trai shnong, kila pyntip ba ka iew shna iing ha ka thain kala iaid mynta la ar-lai taiew eiei mar syn pynbna ka Sorkar ba kan thied jaka ha kaban pynheh ia ka kad liengsuin Shillong Airport. Ki iathuh ba baroh ki trai jaka kynthup ki trai shnong bad ki briew na Shillong, kila pynieng ia ki iing ki sem jongki ha man ki jaka ba lait kynthup naduh ki iing paki dulan haduh ki iing wai.
Haba kylli, kila pyntip ba ka jingthmu hi ka long ba lada dei ban shim jaka ka Sorkar, ka jingsiew bai jaka bad ki iing bala tei, kan long kaba heh khamtam ba ka jingsiew ia ki jingtei ka dei kaba heh dor bha.
Kat kum ka khubor ba ioh, ka Sorkar Jylla haduh mynta kam pat dep sorjamin satia ia ka jaka ba ka thmu ban shim hynrei kaei kaba paw-ka jingpynheh ia ka kad liengsuin kan dei eh na ka bynta ban pynjrong ia ka runway ne ka surok ban hiar bad her ki liengsuin. Kane kan kan urlong tang lada ka jingshim jaka kan dei ha ka shnong Umden Arka bad Umden Mission kiba don hakhmat ka runway jong ka kad.
