Nongpoh, Nailur 15: Da ka jingangnud ban sei ia ka sap kaba rieh ha ki shnong ki thain kyndong, ka kynhun jong ka Risyon Sport Club, Shillong ka la shim ia ka sienjam ban rung sha ki shnong kiba kham pajih ban pynlong ia ki rynsan ialehkai kum ka football ban sei ia ki rangialehkai ba kynsai.
Ia kane la sakhi da ka jingplie pyrda ia ka Risyon Gift Grassroots Initiative Football Tournament, kaba la pynlong ha ka madan jong ka shnong Mawlong, ka thain Umden ha Ri Bhoi District.
La wan ban plie pyrda ia kane ka rynsan ialehkai football da u Bah Plielad Tiewsoh, Chairman ka Ri Bhoi Tourism & Environmental Development Forum (RBTEDF) ha ka jingiadonlang ruh u Bah SK Mallai, nongkitkam ka Risyon Sport Club nalor kiwei kiwei ki riew rangbah.
U Samla SK Mallai u la ïathuh ba ka jingthmu jong ka kynhun ban pynlong ïa kane ka lympung kynjatball ka long ban ailad ïaki samla ba kin ïashim bynta ha ki kam ïalehkai sports bad lyngba kane ka lympung kin jied ruh ïa ki rangialehkai kiban mihkhmat na ka kynhun jong ki sha ki lympung bapher bapher kiban pynlong ha kane ka jylla ne wat shabar ka jylla.
Haba kren ha kane ka sngi, u Bah Plielad Tiewsoh kum u riew rangbah ka thain Ri Bhoi District, u la ai ia ka jingiaroh kaba khraw ia ka kynhun jong ka Risyon Sport Club, kaba la shim ia kum kane ka sienjam ban rung sha ki shnong kyndong ban plie ia ki rynsan ialehkai bapher bapher, ki ban ailad ia ki samla kiba donsap ban ioh sei madan bad pyni paidbah ia ka sap nylla ka jong ki.
U la ong ruh, ba ki don bun bha ki samla kiba don ia ka sap ialehkai, hynrei namar ba kim don pat kino kino ki rynsan ha ki shnong ki thaw jong ki, kane ka sap ka jong ki ka shu sahkut noh tang ha ki shnong jong ki hi. Hynrei ula ong ba kum kine ki rynsan pat kin plie lad shisha ia ki samla ban pyni paidbah ia ka sap kaba ki don bad ruh ban iohlad ban kiew ha la ka sap ka phong.
Ha kane ka lympung lawan ban ïashimbynta haduh 23 tylli ki kynhun kiba napoh ka them ribhoi bad ha kane ka sngi plie ka jingiakhun kaba nyngkong la long hapdeng ka New Star FC (Mawlong) pyrshah ïa ka Umdohkha Them FC.
Shuh shuh u la ïathuh ruh ba ïa kane ka lympung kynjat ball yn sdang shwa ban pynïalehkai ha Ribhoi District bad yn sa bteng pat sha kiwei kiwei ki district.
Pule lang ia kane: Phaikhmat ka Sorkar sha kiwei ki Thain ka Jylla ban wanrah ia ka lynti rel
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
 pyrshah ïa ka Umdohkha Them FC.){kind=link}