Shillong, Risaw 27: Ka Ktien Khasi ka dei kawei na ki 38 tylli ki Ktien kiba la rung mynta hapoh ka thup ban sa ioh ia ka jingithuh hapoh ka Khyrnit ba phra jong ka Riti Synshar ka Ri India.
Hynrei ka ktien Garo kala jah na kane ka thup bad ka khlem paw kyrteng satia, kaba pyni ba ka Ktien Garo ka lah ban nang shimpor ha kaban ioh ia ka jingithuh hapoh ka Riti Synshar ka Ri.
Lah ban kdew hangne, ka Sorkar Jylla kala mynjur da ka Resolution hapoh ka Iingdorbar Thaw Ain ka Jylla, ba kyntu ia ka Sorkar Pdeng ban ai jingithuh noh ia ka Ktien Khasi bad ka Ktien Garo kum ki Official Language ka Jylla da kaba pynrung hapoh ka khyrnit ba phra jong ka Riti Synshar ka Ri.
Ki 38 tylli ki ktien kiba don ha ka thup ki ban dang ioh ia ka jingmynjur ki kynthup ia ka ktien Khasi, Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar lane Gujjari, Ho, Kaachachhi, Kamtapuri, Karbi, Kodava (Coorg), Kok Barak, Kumaoni (Pahari) and Kurak.
Kiwei pat ki ktien ki dei ka Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri or Kosali, Shaurseni (Prakrit), Siraiki, Tenyidi bad Tulu.
Ia mynta, ki don 22 tylli ki ktien kiba la rung ha ka Khyrnit ba phra ka Riti Synshar ka Ri bad kine ki dei ka Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu, bad Urdu.
Dang ha ka 29 tarik bad 30 tarik Nailur, ka Khasi Author Society, kala pynlong ia ka National Seminary bad ka jingiashong kyllain mungor ha Jantar Mantar, Delhi ban pynsawa jam ia ka sur sha ka Sorkar India ba kan pynrung noh ia ka Ktien Khasi ha ka Khyrnit ba phra jong ka Riti Synshar ka Ri.
Halor ka jingbym rung ka ktien Garo, ka Garo Baptist Convention ka pynpaw ka jingsngew diaw halor ka jingkhlem shah kynthup ka ktien Garo lane A-chik hapoh ka thup jong ki 38 tylli ki ktien ban ioh jingithuh haka khyrnit ba phra ka riti synshar ka Ri India katkum ka jingpynbna ka that kam pohing ka sorkar pdeng.
Ka kyrwoh naka GBC ka kdew ba ka ktien bad ka thoh ka tar haka ktien Garo kala kylla dur naduh ki por myn barim bad ki don haduh 1.5 million ngut ki briew hapoh ka thain shathei lammihngi (North East) bad ha 5 tylli ki district ka Meghalaya.
Ka kyrwoh ka kdew ruh ba ki don haduh 33% ki nong shong shnong ka Meghalaya ki kren iaka ktien Garo ne A-chik bad ka ktien kala poi ruh shaka kyrdan Doctoral haba iadei bad ka Pule Puthi.
Ka kdew ruh ba kane ka jingdawa ban ioh jingithuh iaka ktien Garo hapoh ka khyrnit ba phra ka riti synshar ka Ri India kadei kaba la slem.
Haba iadei bad kane ka Garo Baptist Convention ka kyntu iaka sorkar India bad iaka sorkar Meghalaya ban shong bishar bniah ia kane ka jingdawa ka ba dei ka jingmyntoi bad jingkyrkhu iaki nong shong shnong bad ka jylla baroh kawei.
