Guwahati, Naitung 01 : Ka jingialeit peitkai kshaid jong kawei ka Longiing, kala poi pynban sha ka jingsngewsih ha kaba haduh 7 ngut ki briew kila shah rong ha ka jingpoi umsaw kynsan kynsan ha kane ka kshaid namar ka jingther u slap.
Kane ka jingjia kala jia ha ka janmiet sngi U Blei ha Mumbai ha ka wah kaba don marjan ka Bhushi Dam ha Lonavala, kaba jngai kumba 80 km na Mumbai.
Ka khubor ka iathuh ba kine ki shi iing shi sem kiba na Liyaqat Ansari bad Yunus Khan na Hadapsar, Pune, kila leitkai sha kane ka jaka bam khana bad la ki jong ki bahaiing hasem.
Hynrei, namar ka jingpoi umsaw kynsan kynsan ha ka wah, haduh 7 ngut ki briew kila sahkut ha u maw ba don hapdeng ka wah. Ka Umsaw kaba la nang kiew katba nang slap, kala rong ia kine I briew hynrei arngut kila jngi bad la ioh ban pyllait im ia ki.
Ka video bala ioh rong ka pyni ba baroh kine ki briew kila ieng halor uwei u maw hapdeng jong ka kshaid bad kila iapiam para briew ban lait ka shah rong. Hynrei tang hapoh ka shiminit, ka bor jong ka umsaw kala rong lut ia baroh hapdeng ka jingpyrta briew ban iarap.
Haduh mynta, ki bor Sorkar ki dang ioh tam tang lai tylli kimetiap bad kine ki dei kiba la tip kyrteng da u Sahista Liyaqat Ansari (36), Amima Adil Ansari (13), bad Umesh Adil Ansari (8).
Ki arngut kiba dang jah ki kyrteng u Adnan Sabahat Ansari ba 4 snem bad Mariya Akil Saiyyad ba 9 snem.
Ki don da ki spah ngut ki nongshangkai pynngad hajan kane ka wah kiba la sakhi ia kane ka jingjia hynrei ym shym la don mano mano ba lah ban iarap ia kane ka Longiing.
