Nongpoh, Lber 02: Ka Indian National Congress (INC) bad ka National People’s Party (NPP) ki la ioh mar ar seat ha ka result jong ka eleksion MLA 2023 da ka jingjop ki ar ngut ki kyrtong kiba kynthup ia u Bah Sosthenes Sohtun na Jirang Konstituensi, u Damanbait Lamare na Umroi Konstituensi jong ka NPP bad na ka Congress pat u Dr. Celestine Lyngdoh na Umsning Konstituensi bad u Bah Charles Marngar na Mawhati Konstituensi.
Ka United Democratic Party ka la ioh ia ka jingjop tang na Nongpoh Konstituensi da ka jingjop kput u Bah Mayral Born Syiem.
Kumban kdew hangne, ba ka jingniew vote jong ki 5 tylli ki Konstituensi jong ka Ri Bhoi District ka la sdang naduh ka por 8 baje. Ka Sor Nongpoh kala dap smam da ki paidbah kiba la wan ban sngap bad shad kmen hakhmat ka jaka niew vote haba ki la ioh jingtip ba ki kyrtong kiba ki kyrshan ki la khur ia ka nam jingjop.
Ha Jirang Konstitwensi: U Bah Sosthenes Sohtun kyrtong ka NPP u la ioh 12,690 vote ban ioh ia ka jingjop bad ban tam da 1623 vote pat na u kyrtong ka Congress u Bah Adrian L Mylliem u ba la ioh 11,067 vote.
Ha Umroi Konstitwensi : U Bah Damanbait Lamare na ka party NPP u la ioh ia ka jingjop da kaba ioh haduh 13,943 hajar vote bad u la lah ban pynrem pat ia u kyrtong ka TMC Bah George B Lyngdoh u ba dei ruh u MLA, u ba la ioh 12311 vote bad shah tam da 1632 vote.
Ha Mawhati Konstitwensi : U Bah Charles Marngar jong ka Congress ula jop da ka jngioh 13,273 hajar vote bad ban pynliem kput ia Bah Shemphang Lyngdoh na ka party NPP u ba la ioh 8029 bad shah tam da 5,244 vote.
Ha Umsning Konstitwensi : U Dr. Celestine u ba dei ruh u President barim ka MPCC u la khur ia ka jingjop hadien ba u la ioh 9907 vote bad ban pynliem noh ia Bah Sunshine Makri na ka party UDP u ba la ioh 8743 vote da 1,164 vote. U MLA barim Bah Jason Mawlong jong ka NPP ula ioh tang 7945 vote.
Ha Nongpoh Konstitwensi : U Bah Mayral Born Syiem u la khur biang ia ka jingjop da kaba ioh haduh 14,940 bad tam haduh 6,686 vote pyrshah ia ka kyrtong jong ka Congress ka Kong Rona Khymdeit kaba la ioh 8,254 vote bad ia ka Kong Macdalyne Sawkmie Mawlong na ka party NPP, kaba la ioh 7,446 vote.
