Nongpoh, Nailur 26 : Haduh 65 tylli ki Kynhun ialehkai phutbol na kylleng ki thain jong ka Ri-Bhoi District, kila wan ban iashimbynta ha ka lympung ialehkai Ri-Bhoi General League kaba la pynlong da ka Ri-Bhoi District Sports Association (RBDSA).
Ia kane ka lympung ialehkai la pynlong ha madan ialehkai ka Umsning Sports & Cultural Club kaba don ha Patarim, Umsning bad la plie pyrda ia ka hynne ka sngi Ba-ar da u President ka Mawkhar Sports Club Bah Ransom Sutnga.
Kane ka lympung ialehkai kala sdang da ka jingiakhun hapdeng ka Mawkhan Sports Club pyrshah ia ka Mawkei Sports Club, kiba la khur mynta mar shi point da ka jingiakhaid ka jingiakhun mar 2-2 kol.
Kane ka jingiakhun kala iakhaid bha naduh kaba sdang jong ka kylla step da ka jingia ioh thep mar shi kol bad haba wan phai sha ka kylla miet, ruh kine ki kynhun kila ioh ban iathep biang sa mar shi kol, kaba pynkut ia ka jingiakhun ha ka jingiakhaid ba mar 2-2 kol.
Ia kane ka sngi plie pyrda ia ka lympung la sakhi ruh da ki Nongialam ka RBDSA ba kynthup ia u Bah RB Shadap, President, u Bah RR Makdoh, Adviser, u Bah Hamarbajop Wahlang, Deputy Commandant ka 6th Battalion , Umran lem bad kiwei kiwei.
