Shillong, Jymmang 26 : Ka skul Sherwood na Tura sa shisien kala ioh biang ban bat ia ka kyrdan ba hakhlieh duh na ki samla kiba pass haka eksam Secondary School Leaving Certificate Examination ne Klas X bala pynbna result da ka Meghalaya Board of School Educaton (MBoSE) hynne ka sngi Thohdieng.
U Samridhya Das naka Sherwood School uba la ioh 572 marks bad Distinction ha ki 6 tylli ki subject ula ioh iaka kyrdan kab nyngkong haka Top Twenty jong ka result Matric katba ka Jyotipriya Bhattacharjee na St. Margaret’s Higher Secondary School,Shillong kaba la ioh 570 marks bad Distinction ha ki 6 tylli ki subject kala ioh iaka kyrdan ka baar.
Ia ka kyrdan balai la ioh bat da 3 ngut kiba kynthup iaka Tanushri Acharjee kaba na St. Margaret’s Higher Secondary School,Shillong kaba la ioh 564 marks bad Distinction ha ki 6 tylli ki subject, u Ritam Deep Chowdhury jong ka Sherwood School Tura uba la ioh 564 marks bad Distinction ha ki 6 tylli ki subject bad Salrime M Sangma na St. Xavier’s Secondary School,Tura ba la ioh 564 marks bad Distinction ha ki 6 tylli ki subject.
U Ronggrik B Sangma jongka Aeroville Higher Secondary School,Tura ubala ioh 562 marks bad Distinction ha ki 6 tylli ki subject ula ioh iaka kyrdan kaba saw katab iaka kyrdan kaba san pat la ioh da u Kennedy Dondor Richmond Dunai jongka All Saints’ Diocesan Higher Secondary School,Shillong uba la ioh 560 marks bad Distinction ha ki 6 tylli ki subject.
Lah ban ong ha kane ka result kaba mynta ka kynti ki skul kiba na rilum Garo kila paw bha ha kaba kila ioh iaki kyrdan bapher haka Top Twenty jong ka SSLC.
Ha kane ka eksam SSLC kila don 51280 ngut kiba la ialeh iaka eksamin hynrei kiba la pass ki long tang 26629 ngut kaba long tang 51.93% bad ka jingpass ki khynnah ka long kaba duna bha haba ianujor bad u snem uba la dep kaba long 56.96%.
