Shillong, Jymmang 09: U Rishab Purkayastha uba ioh iaka First Position ha ka HSSLC Commerce bad u Arnab Dutta ula ioh iaka First Position haka HSSLC Science Stream, kila pynpaw ba kim shym la poi pyrkhat ba kin ioh iaka kyrdan First Position ha kane ka eksam bala dep wat hapdeng ka jingminot hynrei ka burom ka leit sha ki Nonghikai bad ki Kmie Kpa kiba la ai mynsiem ba ngin poi sha kane ka thong.
“Nga dap da ka jingkmen namar ngam shim la poi pyrkhat ban ngan ioh Position hynrei kane baroh kala urlong kadei namar ka jingkyrshan ka jongki (Kmie Kpa bad Nonghikai) naduh kaba sdang, kumta ka jingjop ka jong nga ka burom ka leit sha ki nonghikai” ong u Arnab Dutta.
Ula ong, ba naduh u Lber jong u snem bala lah, ula khreh kot kumba 2 kynta shi sngi hynrei haba ka eksam kala nang jan kumta ula pynkiew iaka kynta jong ka jingkhreh kot bad iai bteng ban minot thop bad dei na kane ka daw ba ula ioh ia katei ka kyrdan kaba nyngkong.
“Ngi dei ban shaniah ha ki nonghikai, ki kmie ki kpa bad ban shaniah skhem halade da kaba trei shitom hynrei lada ngim lah ban shaniah skhem halade ngin ym lah ban trei shitom” ong u Arnab.
Katba u Rishab Purkayastha uba ioh iaka First Position ha ka HSSLC Science, ula ong “Nga dap da ka jingsngewkmen bad nga lah kyndit ban tip ba nga la ioh iaka First Position bad nga pynpaw iaka jingsngewnguh ia ki nonghikai, ki kmie ki kpa bad ia u Blei halor kane ka jingjop ka jong nga”.
Ula ong naduh ka por ba sdang klas ula pynleit jingmut ban pule kot 2 kynta ha ka shi sngi hynrei ki don ki khyllipmat ba u ioh ban pule tang shi kynta haka shi sngi namar ba u leit skul, leit khreh kot ryngkat bad ka pyndep sa iaka Practical, hynrei katba dang iaid ki sngi ula pynmlien ban pule haduh 2-3 kynta ha ka shi sngi.
“Kum ki khynnah skul ki dei ban ngeit bad kohnguh iaka jinghikai bad jingbatai jong ki nonghikai ha kaba iadei bad ka jingkhreh kot da kaba kiar ia kino kino ki jingpynlap miet bad ka jingpyndonkam ia ki Social Media bad lada lah ban leh ia kane ki khynnah kin ioh ia ka jingjop” ong u Rishab.
