Reservation Policy | Wat sngap ia ka jingpan bhah ki Bar Jylla, dawa ka HITO

Shillong, Jylliew 17: Ka Hynñiewtrep Integrated Territorial Organization (HITO) kala pynrem jur ia ka jingdawa ki bar jylla kiba sah ha ka jylla ban ai bhah lang ia ki ha ka jingiohkam iohkam.

“Ngi kwah ban pynkynmaw ia baroh ba ki riewshimet ka jaidbynriew Hynñiewtrep kim ju dawa bhah hapoh jylla Bihar, Darjeeling West Bengal bad Uttar Pradesh ha ka jaka jong kitei ki jaidbynriew kiba la kdew. Lada ki kwah ban dawa ia ka bhah kidei ban leit dawa ha ka jylla jongki. Kim dei ban iaid palat pud da kaba dawa ia ka bhah ha ka jaka jong kiwei pat ki jaidbynriew” la pynpaw ka HITO ha ka kyrwoh khubor.

Kala ong ba katei ka jingdawa kam dei kaba shong nongrim bad kidei ban kiar ha kaban dawa kuntei namar ba kim don satia ia ka hok ha ka jaka ka jong ngi namar ba baroh kawei ka Khasi & Jaiñtia Hills Districts haduh mynta ki hap hapoh ka Khasi States Treaty ha kaba kine ki jaka kim shym la soi satia ia ka “Instrument of Merger” hynrei kila iasoi tang ia ka “Treaty of Accession” ryngkat bad ka buh kyndon.

“Ngi dawa na ka sorkar jylla ba kam dei ban pynsngap ia ka jingdawa ka jongki namar kane kam lah sha ka jingiakynad. Dei halor katei ka daw, kala don ka jingdawa kaba jur ia ka ILP watla ka Meghalaya ka don hapoh ka Sixth Schedule. Ka long ruh kaba donkam ban pynkynmaw ba ka Meghalaya Transfer of Land Regulation Act 1971 ka khang ruh ia ki bar jylla ban thied ia ki jaka ha Meghalaya,” la ong ka HITO.

“Kumta ngin ym ailad ia kiwei ban tuklar ia ka hok jong ngi ne ban pyrshang ban knieh ia ka pliangja jong ngi bad kin mad ia ka jingpyrshah kaba jur. Kum.kitei ki jingdawa kidei tang ban pynshrai kumta dei ban kiar katba lah. Ki bar jylla kidei ban tip haei ki don ha kaba iadei bad kitei ki ishu. Kidei ban sngewthuh ba kidei tang ki nongshongwai ha ka jaka ka jong ngi bad kidei ban burom ia ka rai kaba shim da ki paid trai riewlum.

“Kiwei pat ki briew ki bym dei ki Hynniewtrep kim don hok ban dawa eiei bad kideo ban khein ialade ba kidei ki khun jong kane ka khyndew ne ba u pud u sam ka Hynñiewtrep kadei ka iingtrai ka jongki” kala pynpaw.

Ka HITO kala ong ruh ba katto katne ki jaidbynriew kiba dawa bhah kideinkijuh hi ki jaidbynriew kiba pynmih ia ka huri hura ha ki thain̈ khappud ka Meghalaya bad Assam da kaba kwah ban pyniasoh noh bad ka Assam (khamtam ha ka thain̈ Langpih). Ka long kaba thamula ba kitei ki jaidbynriew mynta kin kwah ia ka bhah ha ka jylla jong ngi.

“Ka baar katkum ka histori, kitei ki jaidbynriew kiba la kdew haneng kidei kiba donkti ha kaban knieh ia ka hok jong ki paid Hynñiewtrep ha ki snem 1978, 1987 bad ter ter.

Ka balai, ha ka por jong ka jingiakhun ban dawa ia la ka jong ka jylla ym shim la don satia na kitei ki jaidbynriew kiba la kdew haneng ba kin iashimbyntalang ha kaban iakhun naka bynta ban ioh ia ka jylla. Kumta halor kano ka hok ba mynta ki sdang ban dawa ban ai bhah lang ia ki mynta?” la buh jingkylli ka HITO.

“Ngi ngin ym lah ban pdiang ia kum kitei ki rukom pynshrai da ki jaidbynriew ki bym don hok ban dawa eiei ha ka jaka ka jong ngi. Ngi na ka HITO ngi iengskhem ban iada ia ka hok jongki paid ki jong ngi bad ngin ym ailad ia kum kitei ki jingdawa ban pdiang” la bynrap shuh shuh.