Shillong, Rymphang 25 : U President ka Voice of the People’s Party (VPP) Bah Ardent Basaiawmoit ha ka sngi Balang, ula pynpaw ba ka party jong u “kam hun bad sngewtynnad” satia ia ka jingai jingmut jong ka Expert Committee ban pynneh kumba ka long ia ka Meghalaya State Reservation Policy.
“Ngim hun satia bad ngin ym pdiang ia ki jingai jingmut kumba ka long” ong u Bah Ardent haba iakren bad ki nongthoh khubpr hadien ba pynpaw ia ka jingpyrshah ia kane ka kam ha Iingdorbar Thaw Ain.
“Kaei kaba ngi iakren ka dei halor ki jingai jingmut….yn dang ban pdiang bad pyntreikam ia ka. Ka jingkylli ba kongsan ia u Myntri Rangbah ka long la un shim lang ia ki jingai jingmut jong ngi shuwa ba un pdiang bad pyntreikam ia ka” ula bynrap.
U Myntri Rangbah Conrad K Sangma hashuwa kane, ula pyntip ia ka Iingdorbar ba u long uba kloi ban iakynduh ia ki Nongthaw Ain, ia kaba u bah Ardent ula mynjur.
“Nga thikna ba phi iohsngew ba u Myntri Rangbah u long uba kloi ban iakren bad ngi markhmat…ngin sa leit shuwa da kane bad ngin sa nang wad ia ki lad ki lyti kumno ban pynthikna ba kaei kaba ka party ka kwah…ngin sa leh ia ka ha ka lynti kaba dei”.
U Bah Ardent la pynrem ia ka jingshimpor haduh phra bnai hapdeng ka jingaiti ka Committee bad ka jingpynlait paidbah ka Sorkar ia ka kaiphod, da kaba ong ba kane ka jingpynslem kala pynsuba sniew ia ka VPP, watla u bynrap ba ka party kam kwah ban kynthoh palat.
Ula ong “U Myntri Rangbah ula kubur ba ka Meghalaya ka dei ka Jylla ki riewlum….jan baroh ki Jylla riewlum ha ka thain ki don palat 80% ka reservation…wat ka Supreme Court kala ong ba ym lah ban buh ia ki Jylla riewlum ha kajuh ka nongrim kum kiwei…Nga dang kyrmen b aka Jylla kan shim ia ka sienjam kaba tyngeh”.
Haba pynpaw ba ka VPP kan ym kyrkieh ban buh ia ka por, ula ong “Ia mynta ngim pat iohi ia ka jing donkam….ngin sa iakynduh shuwa ia ka Sorkar ban iakren, bad ngi kyrmen ba ka Sorkar kan ai ia ka jubab kaba sngewtynnad”.
Ha kajuh ka por, ka party ka thmu ban wad ia kiwei pat ki lad ki lynti bad ban iasyllok bad u paidbah.
“Ki paidbah ka Jylla ki dei kiba hakhmat eh ha kane ka jingiakhih….ngin hap ban leit sha ki paidbah, ban pynsngewthuh bad ban pan ia ki jingai jingmut” ula ong.
 Bah Ardent Basaiawmoit ha ka sngi Balang, ula pynpaw ba ka party jong u “kam hun bad sngewtynnad” satia ia ka jingai jingmut jong ka Expert Committee ban pynneh kumba ka long ia ka Meghalaya State Reservation Policy.){kind=link}