Tura, Jylliew 15 : U MLA barim ka Tura John Leslee K Sangma ula thoh sha ka Expert Committee on State Reservation Policy, ba ai jingmut ba ia ka bhah ki paid Garo, kaba dei 40%, dei ban kyntiew noh sha ka 50% namar ka Jaidbynriew kam pat ju ioh pura ia ka bhah jong ka policy haba phai sha ka jingioh ia ki kam Sorkar.
“Ka jingkhein jingdiah ha ka iohkam ka pyni ba ki paid Khasi Jaintia ki bat haduh 66.5% ka jingiohkam ha ki Ophis Sorkar katba ki Garo ki ioh tang 33.5% watla baroh ki ar Jaidbynriew ki iohbhah mar 40%” kdew u Leslee ha ka shithi.
Ula pyrshah jur ruh ia ka jingdawa ban shong bishar bad pynthymmai ia ka jingsam bhah na ka Reservation Policy da kaba pynshong nongrim na ka jingdon paid.
“Kiriewsain pyrthei ba mihkhmat ia kiwei pat kiba ioh 40% ha ka Job Reservation Policy ki sngew b aka 40% jong ki Garo kala bun palat bad donkam ban khmih thymmai. Kum u Garo, nga pyrshah jur halor ka nongrim ba kam shongniah bad kaba be-riti” ong u John Leslee bad bynrap ba um lah ban kynthoh eiei lad aka jingdawa jongki ka iaid na ka 20% ka bhah balamang sha kiwei ki riewlum bad ki Open General Category.
Une u MLA barim ka Tura ula mana ia ka Expert Committee ba kan nym ngop ha ka jingdawa ban pynthymmai ia ka Policy tang ban pynhun ia ki seng sain pyrthei.
