Nongpoh, Jylliew 16: Hynriew ngut ki briew kynthup u Nongniah kiba la mynsaw jur haba ka Maruti Alto ba ki iashong, kala shah rat ha ka trok hynne ka step Sngi U Blei hapoh ka surok NH-6 ha Khapamara, Ri-Bhoi District.
Kane ka maruti Alto ka don u nombor AS-AY-5489 kaba la niah da u Rodina Lanong na Qualapaty, Shillong. Kane ka kali ka dang noh na Shillong sha ka thain Sumer hynrei kynsan kynsan kala shah tynrah ha kawei ka trok ba don u Nombor NL01-AE-5956.
Kat kum ka jingiathuh ki Pulit, u nongniah jong kane ka trok ula phet krad na kane ka jaka.
Kine ki briew kiba mynsaw ki kynthup ia u Rodina Lanong, u Jermi O Shullai (27) na Wahtabru, u Eric Mawlieh (25) na Qualapaty, u Edmund Nonghulu (28) na Lumdiengjri, u Francis Pde (28) na Lama Villa bad u Tremiki Suting (26) na Qualapaty Shilong.
Ia kine kiba mynsaw la pynkit sha CHC Bhoirymbong ban ioh ia ka jingsumar.
