Nongpoh, K’lyngkot 26: Uwei u samla ula khlad ha shen katba uwei pat ula mynsaw jur, haba kawei ka trok kaba la pynher sted bha kala rat ia ki ar tylli ki kali hynne ka Sngi Thohdieng ha ka surokbah kaba don ha ka shnong Pahamrioh, Ri Bhoi District.
Katkum ka khubor bala iohlum la iathuh ba katei ka trok kaba don ia u Number AS 01 MC- 8136 kala pynher sted bha bad haba u nongniah ym shim la lah ban tehlakam shuh, ula leit rat ia ka kali Alto kaba don ïa u Number ML 10 C 9558 bad ïa ka kali Eco kaba don ïa u Number ML 10 B – 8800.
Kane ka jingtynrah ka trok kala long kaba jur bha haduh ba u Nongniah ka Eco uba la tip kyrteng kum u Anshu Kumar 20 snem ka rta, ula khlad ha shen, katba u nongniah jong ka trok ula phet krad noh na katei ka jaka mar ia dep rat ia kitei ki artylli ki kali.
La iathuh ba u nongniah jongka Alto ula mynsaw jur bad la pynkit noh ia u sha Shillong na ka bynta ban ioh ia ka jingsumar kaba mardor.
La iathuh ruh ba kitei ki ar tylli ki kali ki dang ieng harud jong ka Surok NH 6 ha ka jaka sait kali, hynrei ka trok kaba la wan na ka liang Shillong bad hiar sha Guwahati kala leit rat ïa kitei ki artylli ki kali.
Halor kane ka jingjia, ki pulit ka Nongpoh kila wan poi mardor sha katei ka jaka bad kila pynlong ia ka jingtohkit.
