Shillong, Naitung 12: Ka Jaiñtia Coordination Committee for Reservation Policy (JCCRP) kala ai jingmut ia ka Expert Committee ba dei ban bhah lang biet hajuh iaka 80% ia ki jaidbynriew Khasi, Jaintia bad Garo da kaba pynshong nongrim kat kum ka jingwan shakhmat ha ka jingiakhun hapdeng jongki.
Ka JCCRP kaba kynthup iaka Jaintia Students Union (JSU), Jaintia Youth Federation (JYF), Jaintia National Council (JNC) & Jaintia Students Movement (JSM) bad ka kynhun ki Rangbah Shnong bad ki Khlieh Nongsynshar ka East & West Jaintia Hills Districts Ka JCCRP, kala aiti ia ka dorkhas hynne ka sngi, ha u Bah L.K Diengdoh, Secretary ka Expert Committee on the State Reservation Policy.
“Kala don ka jingsahdien ha ka ioh ka kot bad ha ka liang ka pule puthi, kaba dei ka dawbah jong ka jingphiah ia ka United Khasi & Jaiñtia Hills District Council bad thaw ia ka Jaiñtia Hills Tribal Areas hapoh ka Para 20 jong ka Sixth Scheduled jong ka riti synshar ka ri India” pynpaw ka JCCRP.
Kala pynpaw ba ka jinglum jingtip shaphang ki jaidbynriew Khasi-Jaintia bad Garo kala pyni ba kala don kajingkiew haka jingbun paid ha kine ki 30 snem kiba la leit ia kaba la donkam ban pynkylla noh iaka jingbhah kaba mar 40:40.
“Ka jingbhah kaba mynta kaba mar 40% ia ki Khasi bad Jaintia ka la wanrah iaka jingbym shai bad ka jingbym ia ryngkat ha ka jingiohlad ban iohkam iohjam. Ngi tyrwa ba dei ban pynbeit thymmai iaka State Reservation Policy (SRP) da kaba banj ur ba kadei ban long katkum ka jingwan shakhmat (merit). Kane ka jingkylla ka long kaba kongsan bha ban pynthikna ba ka rukom shakri paidbah, ka koit ka khiah, ka pule puthi bad kiwei kiwei ki tnad sorkar kin thungkam da ki briew kiba la nang la stad bad ki briew kiba lah ban trei ia ka kam” ong ka JCCRP.
“Da kaba buh hakhmat iaka jinglah bad jingtbit, ngin pynthikna ba ki kyrdan hapoh jong ka sorkar jylla kin dei kiba la pyndap da ki briew kiba don ia ki sap ki phong bad ki kyrdan bad kane kan iarap ha kaban kyntiew ha baroh ki liang ha ka rukom ai jingshakri ka sorkar” kala bynrap.
Ka JCCRP kala pynpaw “Ngi tyrwa ba dei ban bhah beit 80% hapoh jong ka SRP da kaba plie iaka jingiakhun hapdeng jong ki lai tylli ki jaidbynriew kiba kynthup ia ki Khasi, Jaintia bad Garo hapoh ka jylla. Kane kan wanrah ia ka jingailad lang ia baroh bad ban don ia ka mynsiem jong ka jingiakhun bad kan pynshlur ha kaban jied ia ki kyrtong kiba tbit katkum ka jinglah bad ka jingwan shakhmat. Da kaba pyntreikam ia katei ka jingai jingmut, ngi ngeit skhem ba ka jylla jong ngi kan lah ban kiew shajrong bad kan pynbha shuh shuh ha kaban ai ka jingshakri kaba bha ia u paidbah”.
Ha kajuh ka por, ka JCCRP kala ai jingmut ia ka Sorkar Jylla ba ka dei ban khmih bad pybeit thymmai iaka Scheduled Tribes Order jongu snem 1950 ha kaba iadei bad ka jylla Meghalaya, da kaba weng noh ia ki katto katne ki jaidbynriew riewlum kum ki Kuki bad ki 37 tylli ki Sub Tribe na ka thup Scheduled Tribes jong ka Meghalaya.
Ka JCCRP kala dawa na ka sorkar ba kadei ban shimkhia mardor ha kaban pynbeit thymmai ia katei ka kthup jong ki riewlum katkum ka jinglong kaba mynta bad kaba shisha hapoh ka jylla. Kane kan iarap ha kaban iada iaka hok ia ka bha ka miat jong ki trai riewlum kaba kidei hok ban ioh ia ka jingiada bad jingmyntoi katkum ka kyrdan ha ka Scheduled Tribe.
Ka JCCRP kala ai jingmut ruh ia ka sorkar jylla ba ka dei ban khmih bad pynbeit iaka State Reservation Policy man la ka por ban pynthikna ba kan ym don kano kano ka jaidbynriew kaban duh iaka ioh bad ia ki jingmyntoi.
 kala ai jingmut ia ka Expert Committee ba dei ban bhah lang biet hajuh iaka 80% ia ki jaidbynriew Khasi, Jaintia bad Garo da kaba pynshong nongrim kat kum ka jingwan shakhmat ha ka jingiakhun hapdeng jongki.){kind=link}