Shillong, K’Lyngkot 16: Ka jylla Meghalaya kan ialehkai hala ka jong ka jylla pyrshah iaka jylla Bihar haka jingiakhun iaka jingialehkai kaba nyngkong jongka Ranji Trophy Plate Group Semifinal Match kaban long ha ka MCA Ground, Polo ha ka sngi Baar mynta ka taiew.
Katei ka jingialehkai cricket kan sdang naduh ka por 8:30 mynstep ha kaba kan don ruh ka jaka shong na ka bynta ki nongpeitkai bad kan ym don satia kano kano ka jingshim pisa na ki nongpeitkai.
Ka BCCI kala sdang ia ka rukom pynialehkai thymmai na ka bynta ka Plate Group mynta ka aiom, na ka bynta ki 4 tylli ki kynhun kiba wan shakhmat ha ka ban iakhun iaka Semi Final bad ki nongjop ha ki ar tylli ki jingiakhun kin ioh ban rung sha ka Final bad kin ioh ruh ban rung ha ka kyrdan kaba heh ha ka aiom ban wan.
Ka Meghalaya kala ioh long ka lahduh ha ka Plate Group, ha kaba kala jop 4 sien lynter ha ki jingiakhun bad ka rukom ialehkai ki nongialehkai ruh ka long kaba biang bha.
Ha katei ka jingiakob ka Sikkim kala wan baar, ka Manipur kala wan balai bad ka Bihar kala wan ba saw.
Ka Meghalaya kala dep ban pynrem teng iaka Bihar haka 29 tarik u Nohprah da 4 wiket.
