Shillong, Kyllalyngkot 16: Ka Meghalaya Cricket Association hynne ka sngi Palei kala pynbna iaka kyrteng jong ki nongialehkai kiban ialehkai ha ki ar tylli ki jingialehkai jong ka Ranji Trophy 2024-25 kaban long pyrshah ia ka Odisha bad Mumbai.
Ia ka Ranji Trophy la pynsangeh noh shwa ha u Naiwieng jong u snem ba la dep bad ka BCCI kala pynlong noh shwa ia ka Syed Mushtaq Ali Trophy (SMAT) T20 Tournament bad ka Vijay Hazare Trophy kaba dei ka One Day Tournament, kumta hadien ba la dep pynlong ia kine ki jingiakob mynta yn bteng biang ban pynlong ia ka Ranji Trophy naduh ka 23 tarik u Kyllalyngkot.
Ka Meghalaya kan iakhun nyngkongeh pyrshah ia ka Odisha ha nongbah Shillong bad kan iakhun khatduh eh pyrshah ia ka Mumbai naduh ka 30 tarik u Kyllalyngkot ha Mumbai.
Na ka bynta kine ki ar tylli ki jingiakhun la wanrah ia 3 ngut ki Guest Professional Player kiba kynthup ia u Ajay Duhan, Sumit Kumar bad u Anirudh B ia kaba la wanrah biang ha ka kynhun ialehkai bad ka Meghalaya kala jied tang ia ki nongialehkai kiba shong basah ha ka jylla naka bynta ka SMAT bad ka Vijay Hazare Tournament.
Ki nongialehkai kiba la shah jied kin hap ban wan mih ha Majestic Hotel, Shillong ha ka 18 tarik u Kyllalyngkot bad ban sdang ia ka jingpynkhreh kaban sdang ha kasngi kaba bud ha MCA Ground, Polo.
Ka kynhun ialehkai ka Meghalaya ka kynthup ia u Aryan Borah, Akash Kumar Choudhary (C), Anish Charak, Arpit Bhatewara (WK), Bamanbha Shangpliang, Bijon Dey, Dippu Sangma (VC), Jaskirat Singh Sachdeva, Pringsang Sangma, Wanlambok Nongkhlaw, Nishanta Chakraborty, Md Nafees Siddique, Ajay Duhan, Sumit Kumar bad u Anirudh B.
Ki nongialehkai kiba la pynap lypa ki kynthup ia u Arien B Sangma, Chengkam Sangma, Riboklang Hynniewta, Lerry G Sangma bad u Himan Phukan, katba ki Support Staff ki kynthup ia u Prabhakar Bairgond (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer) bad u Bah Dister Marbaniang (Manager).
