Shillong, Naiwieng 19: Ka jingiakhun hapdeng ka Meghalaya bad ka Manipur, ha ka lympung ialehkai jong ka Trophy 2025-26 (plate group), ka la kut noh ha ka jingiakhaid (draw), ha kaba u Rahul Dalal (guest player) u la pynshongshit ia ka madan iakhun baroh kawei ha Surat, da ka jinglah ka jong u ban kamai ia ka spah ron (century) ha kane ka jingiakhun.
Haba wan ban sdang na ka 49/1, ka Meghalaya ka la shim ia ka rai ba kan khylliap noh ia la ka pali ka jong ka hadien ba ka la lah ba kan kamai 239/4 bad ban buh kylla ia ka thong kaba 328 ron ia ka Manipur ban jop ia kane ka jingiakhun, kaba hangne kum ka kynhun kaba la sngewthuh lypa ba kan nym lah da lei lei ba kan kynjoh.ia kane ka thong, la wan shisha da ka jingthmu ban shu ialehkai pyndep ki over ba sah jong ka sngi tad haduh ba kan da kamai 72 ron hadien ba ka la hap noh shi wiket.
Kumban shu phaidien biang sha kane ka jingiakhun, ka Meghalaya ha ka pali wan tied ba nyngkong ka jong ka (first innings) ka la lah ba kan kamai 430 ron, bad ka Manipur kaba la wan ba kan tied hadien ka la lah ba kan kamai 342, kaba pynlong ia ka Meghalaya ba kan tam da 88 ron bad khur ryngkat bad ka lai point.
Kane kan dei ka lynti iaid kaba kut ia ka Meghalaya ha kane ka samoi ialehkai kaba mynta jong ka Ranji Trophy, hadien ba kam shim la mad kano kano ka jingshah rem, hynrei kaba la khanglad khang lynti ia ka ban lah ban jam shakhmat ha kane ka kynti ka dei ki bor ka mei mariang, kiba la ktah jur bha ia ka haduh katta katta, bad ha kaba kut ka lynti iaid ia ka kynhun ka long ba kan ioh ba kan kheit tang kawei ka nam jop pyrshah ia ka Arunachal Pradesh bad ban iakhaid (draw) bad ka Manipur, Bihar bad Sikkim, katba ka jingiakhun pyrshah bad ka Mizoram, kam shim la pynmih satia ia kano kano ka resol.
Katba na ka liang ka Manipur, kane ka jingiakhaid ka pynlong ia ka ba kan ioh khur 18 point, ka Bihar 16 point bad ka Meghalaya kan don ha ka kyran kaba lai hadien ba ka la ioh ba kan khur 15 point.
Haba phai sha ka jingiakhun kaba mynta ka sngi, u Rahul uba la lahban kamai 151 ron ha ka pali ba nyngkong u la bteng ban ialehkai bha ban kamai 103 ron bad iai neh haduh ba kut, ia kaba la iarap ban kyrshan lang ia u na sha shilliang a u Kisan Lyngdoh uba la lah ban kamai 76 ron.
Wat la ka kynhun kam shim la lah ba kan kynjoh sha katta ka thong, pynban ki la don pat ki jingalehkai ban pynsah kynmaw ia ka kynhun baroh kawei, kane ka long ka ar spah ron (double century) kaba la lah ban kamai da u Arpit Bhatewara ha ka jingiakhun pyrshah ia ka Arunachal bad Sikkim, bud sa ki spah ron (century) ba la kamai u Rahul, u Ajay Duhan bad Kishan, bad khlem da lah ruh ban klet ia ka 50 ron ba sted na kiba sted tam kaba la wan lyngba u Akash Chaudhary kiba la wan tang na ki 11 tylli ki bol ha ka jingiakhun pyrshah ia ka Arunachal, kaba kylla long ka rekod kaba thymmai ha ka kyrdan iakhun jong ka first-class, nalor katta u la bteng ruh ban tied lynter ia ki hynriew tylli ki 6, na ka kawei ka over, bad kylla long u batsman ba lai ha ka pyrthei ban lah ban kam lem ia kum une uwei pat u mawmer.
, ka la kut noh ha ka jingiakhaid (draw), ha kaba u Rahul Dalal (guest player) u la pynshongshit ia ka madan iakhun baroh kawei ha Surat, da ka jinglah ka jong u ban kamai ia ka spah ron (century) ha kane ka jingiakhun.){kind=link}