Ranji Trophy | Kamai u Arpit da ka double century ia ka Meghalaya pyrshah ia ka Sikkim

Shillong, Risaw 27: U Arpit Bhatewara, u la lah ban kam ia uwei na ki mawjam hja ka jingim hadien ba u la lah syndon ban kamai da ka double century naka bynta ka Meghalaya ha ka jingiakhun pyrshah ia ka Sikkim, ha ka lympung ialehkai jong ka Ranji Trophy 2025-26 plate group, ba la long ha madan ialehkai kriket ka MCA, Polo, mynta ka lah  sngi u Blei.

U Arpit, u la lah ban dem hi khui ha baroh ka pali batting ka Meghalaya bad dei ma u uba  la out khatduh hadien ba u la lah ban kamai thik 200 ron, kaba la wan lang bad ki 25 tylli ki boundary bad pynlong artad ia ka Meghalaya ba kan lah ba kan kamai 405 ron naka bynta ka pali wan tied ba nyngkong ka jong ka bad ban tam da kumba  59 ron ia ka Sikkim kaba la lah ban kamai 346 ron ha ka pali wan tied ba  nyngkong ka jong ka.

Haba wan ban bteng ia ka pali an tied kaba ar, ka kynhun ialehkai ka Sikkim ka la lah ba kan kamai 96 ron hadien ba ka la hap noh ar wiket, kaba ia mynta ka lad ka lynti ka dang plie ia kine ki ar jylla ba kin lah ban khur ia ka jingjop, ne kaba lah ba kan poi beit tang sha kaba iakhaid ne draw, jong ka sngi kaba kut lashai ka sngi.

Haba wan ban bteng ia ka pali, ka Meghalaya ka la lap ba duh noh ia wiket u kapten u jong ka u Kishan Lyngdoh hadien ba u la lah ban kamai 102 ron, kaba la jia tang ha ka bol kaba ar jong ka over ba nyngkong jong ka step, hadien kane bud pat sa wiket jong u Rahul Dalal.

Shipor ka la buh jingeh bha ia u Arpit ha kaba u donkam ba un ioh lem  ia ka jingkyrshan na sha shilliang, ha kaba wan mih madan u Aryan Borah, uba la iai bteng ban ai ia ka jingkyrshan kaba pura ia u Arpit tad haduh ba un da lah ban kynjoh ia ka thong jong ka double century.

Hynrei shwa ba un kynjoh ia une uwei pat u mawmer, u Arpit u la shu lait ler salit ban out ha ka por ba u la kamai 199 ron, ha kaba u la pyrsyhang ba un mareh ia kawei ka ron, kaba pynlong ia u bad u Borah ba kin ia sahkut lang ha ka juh ka liang, kaba hangne, u Borah, u la aiti noh ialade naka bynta u Arpit khnang ba un lah ban kynjoh ia kane ka thong.

Na ka liang ki nongkawang bol ka Sikkim, ba la ioh ban hur bun tylli ki wiket dei u Kranthi Kumar, uba la ioh ban khur 6/86.

Haba wan pat ban sdang ia ka pali tied kaba ar (second innings), kam shim la bam por ia ka Sikkim ba kan lah ba kan tam shakhmat ia ka thong ba la lam khmat da ka Meghalaya, kampher wat hadien ba ki la lap ba duh noh ar wiket, ha ki kti u Akash Chaudhary (2/30).

Haduh ba kut jong ka sngi u Ashish Thapa (49 not out) bad K Sai Satwik (19 not out), ki dang iai neh hapdeng ka madan iakhun.