Shillong, Nailur 17: Ka Meghalaya Cricket Association kala jied ia ki 12 ngut ki nongialehkai ka jylla ryngkat bad 5 ngut ki nongialehkai kiba la pynap lypa naka bynta ban leit iakhun ia ki artylli ki jingialehkai ha ka Ranji Trophy 2024-25.
Ka Meghalaya kala ioh rung sha ka Elite Group mynta ka samoi hadien ba kala lah ban ialehkai bha ha ka Plate Group ha u snem 2023-24, ha kaba kala long ka Runners-up da kaba shah pynrem noh ha ka Hyderabad.
Ka Meghalaya kan iakhun nyngkong pyrshah ia ka Services ha ka 11 haduh ka 14 tarik u Risaw hashwa ba kan wan sha la iing ban iakhun pyrshah iaka Tripura naduh ka 18 haduh ka 21 tarik u Risaw ha nongbah Shillong.
Ha ka kynhun jong ki 15 ngut ki nongialehkai, dang don sa 3 tylli ki jaka kiba dang dei ban pyndap ia ki Guest Professional da ki nongjied.
Kala don tang katto katne eh ki jingpynkylla ia ka thup kyrteng ha kane ka samoi bad ia kane ka jingjied ia ki nongialehkai la pynshong nongrim hadien ba la khmih bniah ia ki 30 ngut ki nongialehkai kiba la don ha ka thup naduh u Naitung.
Kila don katto katne ki durkhmat thymmai jong ki nongialehkai kiba kynthup ia u Arpit Bhatewara bad u Roshan Warbah, katba ki nongialehkai kiba pawkhmat bha ha ka Ranji Trophy kaba la dep ki kynthup ia u Kishan Lyngdoh, Dippu Sangma bad u Akash Kumar Choudhary, kiba laneh biang ha katei ka kynhun ialehkai ka jylla.
Katei ka kynhun kala ioh ia u Head Coach uba thymmai u Prabhakar Bairgond, uba long u Trainer jongka Meghalaya U-23 Women’s Team ha u snem 2018-19 bad ula long u Coach uba la tbit.
Ki 12 ngut ki nongialehkai kiba na ka jylla Meghalaya hi ki kynthup ia u Aryan Borah, Akash Kumar Choudhary, Arpit Bhatewara, Bamanbha Shangpliang, Bijon Dey, Chengkam Sangma, Dippu Sangma, Jaskirat Singh Sachdeva, Kishan Lyngdoh, Ram Gurung, Roshan Warbah bad u Swarajeet Das.
Ki 5 ngut ki nongialehkai kiba la pynap lypa ne ki Standby ki kynthup ia u Adarsh Joshi, Anish Charak, Lerry G Sangma, Shembhalang Pyngrope bad u Yogesh Tiwari. Katba ki Support Staff ki kynthup ia u Prabhakar Bairgond (head coach), Moisten Ch Marak (assistant coach), Surojit Biswas (physio), Vikash Singh Chauhan (trainer) bad u Bah Dister Marbaniang (manager).
Kitei ki nongialehkai bad ki Support Staff kiba la kdew haneng kin bteng ban don ha ka Preparatory Camp ha Cuttack haduh ka sngi kaba kin mih ban leit sha katei ka lympung kaban long haka 8 tarik u Risaw.
