Nongstoiñ, K’lyngkot 27: Kum ka jingїasnohkti lang bad ki paitbah nongshong shnong jong ka ri baroh kawei ha ka jingrakhe їa ka sngi ba kyrpang ka Republic day, ka Halatynrai Eco Tourism Society kaba treikam ha West Khasi Hills, ka la pynlong da ka prokram ban pynkhuid їa ki jaboh jabaiñ kiba la bret pathar da ki paitbah nongshong shong bad ki nongleit nongwan ha ka wah Nonbah.
Ïa katei ka jingpynkhuid їa ki jaboh jabaiñ, la leh tang da ki nongїalam bad ki dkhot jong katei ka Society, namar na ka liang ki paitbah nongshong shnong kim pat sngewthuh satia kumno ban kiar na ka jingpynjaboh їa ka mariang.
Katei ka kynhun ka la sdang pynkhuid ia kane ka wah naduh ki snem ba la dep ha kaba ki la sdang da ka buit thymmai, da kaba pynap da ka jar na shilliang sha shilliang jong ka wah.
Haba ki jaboh jabaiñ kiba la kit da ka um ki la sahkut ha katei ka jar, kane ka synjuk kala leit ban lum ban lang bad ban thep ha ki byrni ba la pynkhreh lypa khnang ba ka kali kit ñiut kan suk haba thep bad leit bret ha ka jaka ba la pynkhreh lypa.
U bah Teibor Marweiñ President ka Society, u la ong ba ka long kaei kaei kaba I lehraiñ ban peit ba ka wah Nonbah kaba don hapdeng jong ka sor Nongstoiñ, kan rben da ki jaboh bad ki jakhlia kata naduh ki bulor kyiad, ki plastic, ki jaiñ jot, ki synduk kot.
Kaba ijli palat ka dei ba ki don ki nongshong shnong kiba song їa ka eit ha ki plastic bad bret ha katei ka wah. Nangta ki syiar, ki ksew bad ki miaw kiba їap ruh ki bret ha katei ka wah haduh ba la ijli khait ban peit.
Utei u nongїalam ka kynhun u la ong ruh ba ka jingpynjaboh palat їa katei ka wah, ka lah ban dei na ki nonghongwai їing bad na ki nongshong dukan hapoh sor Nongstoiñ khamtam eh kiba shong dukan harud katei ka wah.
U la ong ruh ba ha ki snem ba la dep, ka kynhun ka la pyrshang ban pan ka jingїatreilang na ka ophis PHE, ha kaba ka la ai jingїarap da ki juti bad ki klop kti ban phong haba ki tam їa ki jaboh.
Hadien ba ki la dep pynkhuid bad lum lang їa kitei ki jaboh jabaiñ na wah, ki nongїalam bad ki dkhot ka Society ki la leit buh їa ki polo harud surok bad hakhmat ki dukan, khnang ba kiba їaid ba їeng bad ki trai dukan kin pyndonkam.
