Shillong Iaiong 18: Ki paid riewngeit Khristan kiba don ha kylleng ka jylla Meghalaya hynne ka sngi Thohdieng kila rakhe pyndon burom ia ka ‘Good Friday’ ne ka sngi kaba u khun u Blei u Trai Jisu Khrist ula shah iap ha ka narphna na ka bynta ka pop jong ki khunbynriew.
Ha kane ka sngi kaba kyrpang, ki riewngeit Khristan naduh ka por mynstep, kila leit sha ki iingmane ban iashimbynta ha ki jingiaseng ban kynmaw burom ia ka sngi kaba khraw bad kaba kyntang, ha kaba u Jisu Khrist ula iap da kaba shah sah narphna ban sait ia ka pop jong u khun bynriew.
Da ki hajar ngut ki riewngeit Khristan kiba don ha ki Balang bapher bapher, ha kane ka jylla naduh ki khynnah haduh kiba la noh ka rta, kila leit kiew sha ki iingmane ha ryngkat bad ka riam kaba shongkhia bad sngap bad shah skhor bha ia ki jingialap na ki nongsharai balang shaphang ka khubor Good Friday ha ki jingiaseng kiba kyrpang kiba la pynlong ha kylleng ki jaka jong ka rilum Khasi, Jaintia bad Garo
Ha ka sngi u Blei, kata hadien 3 sngi, ki riewngeit Khristan kin rakhe ia ka Easter Sunday ne jingmihpat jong u Trai Jisu Khrist na ka jingap ban pynim ia ka pyrthei kaba dei ruh ka sngi kaba u Trai Jisu Khrist ula jop pyrshah ia ki bor jong ka jingdum bad ula kiew noh sha bneng ban leit sha la u Kpa.
Ia kane ka Good Friday la rakhe ha kylleng ki jylla kiba don ha ka ri India bad ha ha ka pyrthei baroh kawei bad kane ka sngi kadei ka sngi kaba kyntang bad kaba kyrpang bha ia ki riewngeit Khristan.
