Shillong Nailur 18:Ki shipai Border Security Force (BSF) Meghalaya, hynne ka Sngi Nyngkong kila rakhe ia ka BSF Wives Welfare Association (BWWA) Day da kaba pynlong ia ka prokram ha BSF Campus kaba don ha Mawpat, Shillong.
Ka BWWA Day kadei ka jingrakhe kaba ju rakhe man la ka snem ha u Nailur da ka jingthmu ban kyntiew ia ka bha ka miat jong ki longiing longsem kiba don bynta bad ki shipai BSF.
Kadei ka sngi kaba kyrpang kaba baroh ki longiing ki iawan ban iakynduhlang ha kawei ka jaka ban ia kren ia khana bad ban iatai ruh halor kiwei kiwei ki mat.
Ka BWWA kadei ka kynhun kaba la rejistar hapoh jong ka Registrar of Societies ha Delhi bad la seng ha u snem 1992 da ka jingthmu ban peit ia ka bha ka miat jong ki shipai BSF kiba dang shakri ha ka kam bad wat ia kiba la shongthait na ka kam ryngkat bad ia ka iing ka sem jong ki.
Ka BWWA ka ai jingiarap ia ki kurim jong kito ki BSF kiba la khlad noh da kaba pynbiang ruh ia ka jaka sah ia ki shipor bad ka jingai jinghikai ban pynkupbor ia ki ha ka ioh ka kot.
La sdang ia ka jingrakhe da ka jingthang ia ka sharak da ka Umanjali Mishra kaba long ka President jongka BWWA Shillong bad la pynshongkun da ki khun jong ki BSF kiba la iashimbynta ha ka prokram pyni iaka kolshor bad la wan ban sakhi ia kane ka prokram da ki bahaiing bahasem jong ki BSF.
Ka President jong ka BWWA kala sam ia ki marbam mardih bad ia ki tiar ki tar sha ki kurim jong ki BSF kiba la khlad noh.
Kala kyntu ia ka BWWA ba kadei ban iadonbynta ha kaban pynlong ia ki prokram bapher bapher kynthup ia ka jingai jinghikai, ka prokram kaba iadei bad ka pule puthi bad ka koit ka khiah, ka jingai jinghikai Computer bad ban shimkhia thikna ia ka jingdonkam jongki longiing longsem jong ki BSF.
