Shillong Risaw 09: Ka 119 Territorial Army (Infantry Battalion), Assam kaba don ha Kenches Trace, Shillong kala rakhe iaka Raising Day jong ka Territorial Army hynne ka sngi Nyngkong.
Ha ka 9 tarik u Risaw la pynlong ia ka jingrakhe kum ka dak ban kynmaw burom ia u Governor General banyngkongduh u C Rajagopalachari kaba la long ha katei ka sngi ha u snem 1949.
La pynlong ia ka jingialang ki bapher kum shi bynta jongka jingpynkhreh ia katei ka jingrakhe.
Hynne ka sngi, la pynlong ia ka Blood Donation Camp da ka 119 TA, Assam ha ka jingrakhe iaka TA Day da kaba iatreilang bad ka Department of Transfusion Medicine and Blood Centre, NEIGRIHMS, Shillong ha kaba bun ngut kila iashimbynta ha kaban noh synniang ia ka snam ka jongki bad na ka liang jongka NEIGRIHMS kala ai iaka sertiphiket ia katei ka Unit kum ka dak jong ka jingai khublei halor ka jingnoh synniang ia ka snam.
Ka Territorial Army jadei shibynta jong ki shipai bad ka kamram jongka, ka long ban pyniarap ia ki shipai naka kam kaba khia ka jongki bad ban iarap ia ki bor kiba dei khmih haba don ka jingwan lynshop ka bor mariang bad ban pynpoi ia ki marbam mardih ha kino kino ki jingjia, haba don ka jingshah ktah jongki jingim briew ne haba don kano kano ka jingma bad jingshah ktah jongka Ri bad ka ai ruh ia kano kano ka jingkyrshan bad jingiarap haba ki shipai ka Ri ki donkam.
