Shillong, Naiwieng 23: Da ki hajar ngut, hynne ka sngi U Blei, kila iatuid sha madan Weiking, Shillong ban rakhe ia ka Seng Kut Snem kaba 126, ka jingrakhe kynmaw burom ia ka jingseng ia ka Seng Khasi ha u snem 1899.
Ka Seng Kut Snem ka dei ka jingiakhih iaksar kaba la sdang na ka bynta ban iada ia ka jingngeit tynrai, ka riti dustur bad jinglong tynrai jong kiba dang bat dang ksoh ia ka niam Khasi paka.
Dei ha ka 12 tarik u Nailar 1899, 16 ngut ki samla Khasi kila thaw ia ka Seng Khasi ban iada ia ka niam tynrai, ka kolshor kaba riewspah bad ia ka ktien ka thylliej paka ha ka jingwan tynjuh kaba la wanrah da ki bor synshar phareng bad ki mishoneri Khristan.
Naduh katei, kane ka jingiakhih ia ksar kala sdang ban iohbor, kaba la pynrung ia ka mynsiem jong ki samla Khasi ban sngewsarong ia la jingriewspah bad ia ka jingioh pateng kaba kyrpang.
Hynne ka sngi, da ki hajar ngut ki paitbah kiba dang bat ia la ka niam tynrai, kiba kynthup naduh ki samla, ki rangbah bad ki longkmie kiba la riam tynrai kila ia mih ban iaid ha surok jong ka nongbah ban pyni ia la ka jingdon burom bad jinglong kordor jong ka niam bad ka kolshor u Khasi.
Kane ka jingiaid kjat kaba shongkun kadei kaba la pyninam ia ka kolshor bad ia ka riti dutur kaba riewspah jong u Khasi lyngba ka tem ka put bad ka jingpynkhreh kyrpang ia ki tabut kiba don ia la ki khana bad ki jingpynpaw halor ka jingriewspah bad ka jingiphuh iphieng jong ka rukom im, kiba dang bat dang ksoh ia ka niam tynrai.
Ka “Ïaid Pyni Riti” kala sdang na Madan Iewrynghep bad la pynkut pat ia kane ka jingiaid ha Madan Weiking ha Jaiaw, ha kaba la ioh ia ki jingshad tynrai bad la buh jingduwai kyrpang ruh ha kane ka sngi kaba kyrpang.
