Rakhe ka MPHRC ia ka sngi hok longbriew manbriew

Shillong Nohprah 11: Ka Meghalaya Peoples’Human Rights Council (MPHRC) kum shibynta ban ïasnoh kti lang ha shi tyllup ka pyrthei, ka kynmaw burom mynta ka sngi ka 10 Tarik u Nophrah kum ka Sngi Rakhe ïa ka Hok Longbriew Manbriew bad dei ha kane ka sngi, ba ha u snem 1948, ka Dorbar Bah jong ka Synjuk ki Ri (United Nations) ka la pdiang ban pynjari ïa ka Dulir pawnam kaba tip salonsar kum “Ka Jingpynbna-ïar Satlak ïa ki Hok Longbriew Manbriew” (Universal Declaration of Human Rights). Ka phang jong ka jingrakhe ka dei “Ka Jinglaitluid, ka jingïaryngkat bad Ka Jingbishar Hok ïa baroh”.

“Kane ka Dulir pawnam kaba tip mynta kum ka Jingpynbna-ïar Satlak ïa ki Hok Longbriew Manbriew kala pynskhem ba ïa ki bynriew baroh la kha laitluid bad ki ïaryngkat ha ka burom bad ki hok kynti bad jinglaitluid khlem ka jingpynïapher la ka long kum ka jaitbynriew, ka rong ka sniehdoh, ka ktien ka thylliej ne kano kano ka jinglong” ong ka MPHRC ha ka kyrwoh khubor.

“Ha kane ka sngi, ngi khot bad ngi wer ïa baroh ki paid nongshong shnong ba ngin ïai pynskhem bad ïai kut jingmut ban ïeng tylli bad ïada ïa ka Hok Longbriew Manbriew, ban ai jingkyrshan khamtam eh ïa kito ki briew kiba dang ïaksaid ban ïoh ïa ka Jingbishar Hok bad ha kajuh ka por ban pynrem jur pat ïa kito ki briew ne ki kynhun kiba ïuhroit bad pynhiar dor ïa kyrdan jong ka Hok Longbriew Manbriew kaba la pynkhamti katkum riti synshar paidbah ne da ka aiñ hi” ong u Bah Dino DG. Dympep, Chairman ka MPHRC.

Ka MPHRC ka ai burom kyrpang ïa ka jingnud bad jingshlur jong ki riewshimet, ki nongtrei monsngewbha, ki seng bhalang kiba ju mih shakhmat khlem jingtieng ne jingsmiej ban kren bad ïaksaid ïa ki mat kiba ktah ïa ka hok paidbah ha kane ka jylla, la ka long da ka lynti jong ka jingïasaid ban pynshongñia lyngba ki jingïakhih kiba jai jai.

“Ngi ïai ai ka jingkyrshan kaba pura ïa kiba paidbah bad ki sengbhalang baroh kiba ju mih shakhmat ban dawa bad ban pynïoh ïa ka jingbishar hok khamtam eh na ka bynta kito ki briew kiba la ngat ha ka jingshah sait ïap bad mynsaw jur bad shah pynkheiñ, shah ïuhroit ïa la ka Hok Longbriew Manbriew ha ka kti ki Pulit. Halor kine ki jingjia kiba sngewsih ngi ban jur ba ka sorkar Meghalaya b ka dei ban pynïoh mardor ïa ka Jingbishar Hok sha ki bahaïing hasem jong kito kiba la khlad noh bad kiba mynsaw bad ban pyntikna ba kin lah pat ban ïoh ïa ka lad ban im suk, im saiñ kumba marïaryngkat lang salonsar” ong ka MPHRC.
Ka MPHRC ka pynrem jur ïa baroh ki kam sniew bad ka jingkhihkla kiba la jia shen ha ka jylla khamtam eh ba ki la don bun ngut ki briew shimet kiba la ngat ha kum kine ki jingjia kiba khlem poi pyrkhat la ka dei ïa ki paid trai ri muluk, ki jait bynriew ritpaid ne kino kino ki kynhun bad khamtam eh ïa ka jingshah ktah kti jong ki nongthoh khubor bad ha kum kine ki jingjia ka Sorkar ka dei pynlong da ki jingtohkit kaba bniah khnang ba ki briew kiba ngat ha kum kita ki apot kin lah pat ban ïoh ïa ka jingbishar kaba hok.

“Ngi dawa jur na ka Sorkar ba haba ka don kano kano ka jingshah kynnoh ba ka don ka jingthombor bad ka jingshah ïuhroit ïa ka Hok Longbriew Manbriew ïa kum kita ki jingshah kynnoh dei ban pynlong da ka jingtohkit kaba khlem ïa shah liang bad haba lap ïa kino kino ki briew Sorkar ba ki long ki nongpynkheiñ aiñ ka dei ban pynsaja mardor ïa ki. Nga ban jur ïa ka Commission Sorkar ba kam dei ban shu shong khli kti bad ban shu peitkai ïa baroh ki jingjia kiba ïadei bad ka jingthombor ïa ka Hok Longbriew Manbriew, hynrei ka dei ban shim khia mardor ïa ki synjam ban pynlong ïa ka jingtohkit khnang ba kan don ka jingbishar hok ïa kita ki kam thombor kiba ju leh da ki kynhun pulit bad ki briew Sorkar” ong ka MPHRC.

Ka MPHRC ka pynkynmaw ïa baroh ba ka Hok Longbriew Manbriew katkum ka Dulir kaba la pruid dak naduh u snem 1948 ka pynkupbor ha man uwei pa kawei kum ki nongshong shnong ba ki don ïa ka Hok ban ïoh jingïada bad ka jingshongshngaiñ kiba yn ym lah ban pynïakhlad na ka burom bad ka jingsan laitluid ha ka longbriew manbriew jong baroh.