Shillong, Nailur 21: Ka Meghalaya Bharat Scouts and Guides (MBS&G) hynne ka sngi, pynlong iaka Live Interview bad Panel Discussion kum shi bynta jongka jingrakhe iaka International Day of Peace bad ka jingrakhe iaka Jubili Ksiar ka jong ka.
Man la u snem, ka MBSG ka ju rakhe iaka International Day of Peace haka 21 tarik u Nailur bad ki riewshemphang kila iatai sani halor ka mat “End Racism. Build Peace” kaba dei ka mat jingrakhe mynta u snem.
Ki riewshemphang kila iatai sani halor katei ka mat bad kila pynleit jingmut ruh halor kiwei pat ki mat ba ka jingsuk ka sdang nalade shimet, ban ym don kano kano ka jingnoh shilliang hapdeng ki shynrang bad ki kynthei, ka kamram jong ki lad pathai khubor ban wanrah iaka jingsuk haka pyrthei bad kumno ki briew ki lah ban noh synniang naka bynta ban ioh iaka jingsuk.
Ka Dr. M.P.R. Lyngdoh, Vice President jongka MBSG, kum ka kongsan kala kren halor ka jingdonkam ban pynduhjait ia ka jingsngewpher niam ne jaidbynriew bad ia ki kam uaumsnam.
“Ngi don ia ki briew ki bapher bapher kiba don ia ki jingngeit bad ki riti dustur ki bapher bapher hynrei ngi long pat kawei kum ki nongshong shnong ka ri India. Ngi dei ban kynmaw ba ka ri ka long kaba iatylli wat lada ki jaidbynriew ki bapher bapher” ong ka Dr Lyngdoh.
“Kawei pa kawei ka Kolshor kadei ban pynmih iaka jingbha bad kawei pa kawei ka kolshor kadei ban noh synniang sha ka jingitynnad bad jingbha jong ka ri jong ngi. Ngi dei ban pynneh pynsah iaki rukom im, ki ktien ki thylliej, ka tem ka put, ka shad, ka thoh ka tar bad ka sorkar kala leh bun kiei kiei ban pynneh pynsah ia kitei” la pynkut ka Vice President ka MBSG.
