Sam cheque ba T.220 klur sha ki nongioh jingmyntoi na ki skhim bapher bapher
Tura, Lber 06 : U Myntri Rangbah ka Jylla Conrad K Sangma ha ka sngi Thohdieng ula ong ba ka jingthew ba shisha ia ka roi ka par ka shong ym tang ha ki jingtei hynrei ha kaban kyntiew ia ka jingim ki paid nongshongshnong.
U Conrad ula kren ia kane ha ka jingialang rakhe ia ka jingdap 8 snem ka Sorkar Meghalaya Democratic Alliance (MDA) bala jer kyrteng “Our Magnificient Meghalaya | Vision 2032” kaba pynlong ha PA Sangma Sport Complex, Tura.
Ha kane ka jingialang la iashimbynta lang ki Symbud Myntri Rangbah Bah Prestone Tynsong bad Bah Sniawbhalang Dhar, u Lamphang ka Iingdorbar Thomas A Sangma, u Myntri ka Tourism Timothy D Shira, nalor kiwei ki Myntri, ki MLA bad ki Heh Sorkar.
Haba kren ha ka jingialang, u Myntri Rangbah ula iathuh khana ia ka jingiaid lynti jong ka Sorkar ha kine ki phra snem bala leit hadien ba shimti ia ka Ophis ha ka 6 tarik Lber 2018, haba kubur ruh ba don shibun ki jingtynjuh kiba iakynduh bad ai khublei ia ka jingkyrshan bad jingiatreilang ki paidbah.
“Ka lynti iaid jong ngi ka dap da ki jingtynjuh bad ki jingeh, hynrei da ka jingkyrkhu uba nalor bad ka jingkyrshan jong ki briew jong ngi, ngi la lah ban jop ia bun na kine ki jingeh” ula ong.
U Conrad ula pyntip ba ka jingkiew shaphrang ka Jylla kala ioh ia ka jingithuh hapoh ka Ri, haba pynpaw ba la ioh pdiang ia ka shithi na u Myntri Rangbah Duh ka Ri Narendra Modi ha ka Meghalaya Day, ba ai khublei ia ka Jylla haba iadei bad ka lynti iaid ka roi ka par bad ka jingkylla ha ka ioh ka kot.
“Mano ban mutdur ba ka Jylla barit kum ka Meghalaya kan long shisien ka sngi kaba lah ban iakhun bad kiwei pat ki Jylla ba kham kiew hapoh ka Ri? Hynrei mynta ngi ieng hapdeng jong ki haba phai sha ka jingkiew ka ioh ka kot” ula ong haba bynrap ba u Myntri Rangbah Duh ula ai ka jingiaroh ia ka rukom nang pyniaid ka Jylla ia ka pla tyngka.
Haba kren halor ki kam ba hakhmat jong ka Sorkar, u Myntri Rangbah ula ong ba ia ka roi ka par ym dei ban bishar tang na ki jingtei kiba lah ban iohi kum ki surok, ki skul bad ki jingtei ka Sorkar.
“Kaba kham kongsan eh ka roi ka par ka dei kaba ki paidbah ki lah ban sngew-haba ia ki jingim la lah ban iada ha ki hospital, haba ki khynnah ki ioh ia ka jingpule lane haba ka kamai ki nongrep ka kham kiew” ula ong.
U Myntri Rangbah ula kren ruh halor ka jingiasngewthuh lang hapdeng kito kiba trei ha ka Sorkar. “La ki dei ki nongtrei Sorkar, ki MLA ne Minister, ki briew ki trei ym tang namar ba ngi hap ban trei. Ki iatrei namar ki tip ba ki kam ba ki trei ka wanrah ia ka jingpher ha ka jingim jongno re jongno” ula ong. “Kaei kaba pynlong ia kane ka Sorkar kaba pher ka dei ka jingkut jingmut ban nym kynran dien bad ka jingngeit ba man ki jingpyrshang ba ngi leh ki lah ban wanrah ia ka jingkylla ha ka jingim jongno re jongno ha ka Jylla” ula bynrap.
Ha kajuh ka por, u Symbud Myntri Rangbah Bah Prestone Tynsong ula niew ia kane ka jingialang kum u mawmer ba kong san bad iathuh ba ka jingiarap song pisa ba kot kumba T.220 klur lah sam sha ki nongioh jingmyntoi ha kane ka jingialang.
“Ha ka shisngi, ka Sorkar kala sam kumba T.220 klur beit beit sha ki briew na ka bynta ka bha ka miat jong ki” ula ong.
Ha kane ka sngi, u Myntri Rangbah ula pynlait ruh ia kiba bun ki prokram bad ki skhim bhalang ba kynthup ia ka Chief Minister’s Scholarship Scheme na ka bynta u snem 2025–26, ba kot T. 5 klur bad ai jingmyntoi ia 98,751 ki khynnah pule, bad kumjuh ruh ka Uniform Grant lyngba ka Direct Benefit Transfer ba kot palat T.3 klur na ka bynta 50,000 ngut ki khynnah pule.
U Conrad ula plie paidbah ruh ia ki 101 tyli ki Community Hall ba don ha kylleng ka Jylla kiba la pyntrei hapoh ka Project for Community-Bases Forest Management nad Livelihood Improvement ha Meghalaya, bala kyrdan sah ka Japan Internatoonal Cooperation Agency bad ka Chief Minister’s Special Development Fund (CMSDF).
Nalor kine, la plier uh ia phra tylli ki warehouse bad Common Facility Centre (CFC) ha ri-lum Garo kiba la pyntrei hapoh ka CM Elevate, ban pynkhlain ia ka jingpynmih mar na ki marrep bad ka jingsengkam sengjam.
Ki nongioh jingmyntoi na ki skhim bapher bapher ba kynthup ia ka CM Farm+, CM Elevate bad ka CM Homestay Misson, kila iathuh khana ia ki jingshem jong ki ha kane ka jingialang, haba pyntip ba katno kine ki prokram ka Sorkar kila kyrshan ia ki nongrep, ki nongsengkam bad ki nongpyniaid ia ki kam jngohkai.
U Lamphang ka Iingdorbar Thomas A Sangma ula ai khublei ia u Myntri Rangbah namar ka jinglong Myntri Rangbah ba neh slem eh ha ka jingshakri ha ka histori ka Meghalaya haba khot ia ka jingtreilang hapdeng ka Sorkar bad ka Liang Pyrshah ban lah kynjoh ia ka thong ka roi ka par ba buh da ka Sorkar.
Kane ka jingialang, kaba sdang da ka State Anthem, kala sakhi ruh ia ka jingbatai ia ki kam bala pyntrei da ka Sorkar ha kine ki phra snem bala leit bad ka lynti iaid (roadmap) hapoh ka Vision 2031, kaba thmu ban nang pynjanai ia ka jingai jingshakri, nang pynbun ia ki jingtei ba kongsan bad nang pynbun ia ki lad kamai kajih ha kylleng ka Jylla.
