Nongpoh, Jylliew 21: Kum shi bynta ban ia snoh kti lang ha ka jingrakhe ia ka International Yoga Day ha kylleng ki ri ka pyrthei, kaba la ju rakhe man la u snem ha ka 21 tarik u Jylliew, ka Ri Lajong Farmers Produce Organization kum ka kynhun nongrep na Ri Bhoi ka la rakhe ia kane ka sngi ba la tip kum ka International Yoga Day.
Ia kane ka jingrakhe la pynlong ha Gladden Tower Hall, Nongpoh ha kaba ki nongialam bad ki dkhot katei ka kynhun ryngkat ki samla bad ki heprit ki la wan ban shim bynta ha kaba rakhe ia kane ka sngi ba la tip kum ka International Yoga Day.
Haba shim bynta ha kane ka jingrakhe ia ka International Yoga Day, ki nongrep ryngkat ki samla bad ki heprit ki la pynlong ia ka jingkyllan met kiba dei katkum ka kyndon ialehkai jong ka jingialehkai Yoga.
Haba kren sha ki lad pathai khubor, ka President bad Vice President ka Ri Lajong Farmer Produce Organization, ka Kong Mariam Maring bad u P.S Toor, ki la pynpaw ia ka jingkmen ba ki la ioh ban rakhe ia kane ka sngi International Yoga Day, kaba dei ka sngi kyrpang jong ka jingialehkai Yoga, ba ia kane ka jingjaid jingialehkai la tip ym tang ha India bad ha kylleng ki ri ka pyrthei.
Kitei ki nongialam ka kynhun seng nongrep na Ri Bhoi, ki la ong ruh ba ka jingialehkai Yoga kam dei ban long tan shisien shisnem haba rakhe ia kane ka sngi kyrpang, hynrei ban ialehkai Yoga ka dei ban long man ka sngi bad lada ngi lah ban pynlut por tang kumba 1 kynta ngin long kita ki nongshong shnong kiba koit ba khiah.
Shuh shuh, ki la phah ruh ka khubor sha baroh ki paidbah ka Ri Bhoi bad ha ka jylla hi baroh kawei ba ngin dei ban sngewthuh ia ka jingkordor jong ka jingkoit jingkhiah bad ngim dei ban leh sting kum ka jingialehkai Yoga ka dei kawei ka jingialehkai kaba ngi lah ban ioh ia ka jingkoit jingkhiah, namar lada ngim long kiba koit ba khiah ngi long kiba sahdien bad ka jylla bad ka ri hi baroh kawei ka long kaba sahdien lada ngim don ia ka jingkoit jingkhiah, ki la bynrap.
