Shillong, Nailar 29: Ka tnad Sports & Youth Affairs hynne ka sngi, kala rakhe iaka National Sports Day da kaba pynlong iaka prokram ha Tennis Court, J. N. Stadium Complex, Polo Ground, Shillong.
Kane ka prokram kadei shi bynta jong ka jingrakhe baroh shi taiew ha ka ri India baroh kawei, da kaba pyndonbynta lang ia ki paidbah naduh ki barit haduh kiba la rangbah kum shi bynta jong ka jingrakhe iaka sngikha jongu khlur ialehkai Hockey u Major Dhyan Chand.
U Myntri ka tnad Sports & Youth Affairs u Bah Shakliar Warjri ula leit iashimbynta kum u kongsan ha katei ka jingrakhe.
Haba kren ha ka jingialang u Bah Shakliar Warjri ula iaroh ia ki Deputy Commissioner jong baroh 12 tylli ki District ka jylla halor ka jingtrei shitom ban peit ba ka jingpynlong ia ki jingialehkai ki bapher bapher ha baroh shi taiew, ban pynlong iaka jingrakhe iaka National Sports Day kaba jop haka jylla baroh kawei.
U Myntri ula kyntu bad ai mynsiem ia ki samla ka jylla ba kin ialehkai ia ki jingialehkai ym tang ban shu pyrbyrngia ialade hynrei ban shim kum ka lynti ban tei ia ka lawei ka jong ki.
Ula banjur ruh ba ka sorkar ka don iaka jingkitkhlieh ban kyntiew iaka sap ka phong jong ki nongialehkai khnang ba kin lah ban iakhun ha ki kyrdan National bad International bad ula pynpaw iaka jingdonkam ban don iaki sienjam kiban lah ban don ka jingiatreilang kum ka kynhun, hapdeng ka sorkar jylla, ki Sports Association bad kumjuh ki nongialehkai ha kaban poi sha ka thong kaba la buh da ka jylla, da kaba ai nuksa ban phah ia ki nongialehkai ka jylla ban ioh mihkhmat ia ka ri India haka Olympic Games 2032.
Ha katei ka prokram, u Myntri Sorkar ula pyllait paidbah iaka Meghafit programme, ka prokram naka bynta ia ki kam ialehkai, ka kolshor ban im iaka jingim kaba koit ba khiah ha ka jylla bad ban pynlong iaka Meghalaya kum ka shlem jong ka jingkoit jingkhiah.
Ha katei ka sngi, la pynkup burom ia ki nongialehkai da kaba ai iaka song tyngka halor ka jinglah ka jong ki ban wanrah nam bad burom iaka jylla bad ia ka ri.
Kine kiba la shah pynkup burom ki kynthup ia 1 Nongialehkai bad 1 u coach na ka Meghalaya Archery Association, 18 ngut ki nongiakura bad 3 ngut ki coach jong ka Meghalaya Boxing Association, 18 ngut ki nongialehkai football bad 2 ngut ki coach jongka Meghalaya Football Association, 84 ngut ki nongialeh Karate bad 3 ngut ki coach jongka All Meghalaya Karate-Do Association, 10 ngut ki nongialehkai bad 3 ngut ki coach jong ka Meghalaya Judo Association bad 4 ngut ki nongialehkai ryngkat bad 1 u coach na ka Meghalaya Sports Climbing and Mountaineering Association.
Ha ki jingailehkai ki bym kynthup ha ka Olympic la pynkup burom bad ai da ka song tyngka ia ki 4 ngut ki nongialehkai bad 1 Coach jongka Meghalaya Wushu Association, 7 ngut ki nongialehkai bad 1 coach na ka Meghalaya Arm Wrestling Association, 37 ngut ki nongialehkai bad 5 ngut ki coach na ka Muay Thai Association of Meghalaya bad 30 ngut ki nongialehkai ryngkat bad 2 ngut ki coach jongka Meghalaya Jeet Kune-Do Association.
La pynkut ia ka prokram da ka jingialehkai football paralok hapdeng ka Officers FC bad MLA FC ha MFA Turf, Polo Ground, Shillong ha kaba ka Officers FC kala pynliem iaka MLA FC da 5-0.
