Shillong, K’lyngkot 30: Ka Jylla Meghalaya hynne ka sngi Thohdieng ryngkat lang bad ka ri hi baroh kawei, kala iashimbynta ha kaban rakhe ia ka Martyrs’ Day ne ka sngi pyndonburom ia ki nongiakhun laitluid ka ri kiba len ia la ka jingim ban pynioh jinglaitluid ia ka ri bad kumjuh ban rakhe pyndon burom ia ka lyngkhuh sngi iap jong u Mahatma Gandhi.
Ha ka nongbah Shillong, ki heh ophisar sorkar hapoh ka jingialam u Principal Secretary u Bah F.R. Kharkongor ula leit ban buh syntiew ha u mot sahnam jong u Mahatma Gandhi uba don ha Main Secretariat.
La pynpah ia ka Siren ha ka por 10:59 mynstep bad la pynbud pat da ka jingsangeh ia ki kam ki jam baroh, ka jingiaid ki kali bad ka jingiaid ki briew bad ka jingsngap jar kaba 2 minit.
Kum shi bynta jong kane ka jingkynmaw burom, ka All India Radio kala pynsangeh shipor ia ka jingpynbna ia ki khubor bad ka Siren ka baar kala sawa biang ha ka por 11:02 mynstep kum ka dak jong ka jingpynkut ia kane ka jingleh burom.
Ia ka Martyrs’ Day la pynlong man la ka snem ha kylleng jong ka ri India ban ai burom ia ka jinglen lade jong ki nongialam kiba la iakhun ban pynioh jinglait luid ia ka ri bad ban iai kynmaw ia ki kam ba khraw ki jongki.
