Shillong, Lber 08: Ha ka jingrakhe ia ka International Women’s Day 2025 kaba lah pynlong ha State Convention Centre, Shillong, ka jylla Meghalaya kala pyni ia ka jingpyrshang tyngeh jong ka sorkar jylla ban kyntiew ia ki kynthei bad pynioh bynta lang ia ki ha ka ioh ka kot.
Ia kane ka prokram, la pynlong da ka Tnad Social Welfare ryngkat ka jingiatreilang bad ka Meghalaya State Rural Livelihoods Society (MSRLS) halor ka phang “Accelerate Action” bad kala kynmaw ruh ia ki 10 snem jong ka Beti Bachao Beti Padhao (BBBP) Scheme.
Kawei na ki bynta ba kongsan tam jong kane ka jingrakhe ka long ka jingpyllait pisa kumba ₹25 klur sha ki Self-Help Group (SHG) kaba la ialam da ki kynthei, lyngba ki tnad bank kum ka SBI, MCAB, bad MRB. Kane ka jingiarap ka long na ka bynta ban kyntiew ia ki SHG bad ban plie lad ia ki ba kin ia ioh bynta lang ha kam roi kam par. Ka SBI ka la ai ₹3.92 klur, ka MCAB kala ai ₹3.11 klur bad ka MRB kala noh synñiang ₹17.89 klur.
Ha ka jingkren jong u Myntri ka Social Welfare,u Bah Paul Lyngdoh, ula pynshai halor ka bynta ba kongsan ba ki kynthei ki don ha ka imlang sahlang, ka ioh ka kot, bad ka rukom im ha ka jylla Meghalaya. Ula pynshai ba ka Tnad Social Welfare ym tang ba ka ai jingmyntoi ia ki kynthei shimet, hynrei kala pynkylla dur ia ki shnong ki thaw lyngba ka pule puthi, ka kamai kajih bad ki lad synshar khadar, ban thaw ia ka imlang sahlang kaba skhem.
Ka Myntri ka koit ka khiah ka Dr. M. Ampareen Lyngdoh, kala pyllait ia ki tiar sanitary pad vending machine, ban pynphriang ia ka jingtip halor ka jingkhuid jingsuba ha ki kynthei. Kala batai ruh shaphang ka MOTHER Program, kaba la kyntiew ia ka koit ka khiah bad ai jingiarap ruh ia ki longkmie bad ia ki khyllung.
Kala kdew ba palat 60% jong ka jingmang tyngka ha ka jylla ka leit sha ki prokram kynthei, kaba long ka dak jong ka jingangnud ban pynroi ha ki liang ka koit ka khiah, ka pule puthi, bad ka ioh ka kot jong ki kynthei.
U Pravin Bakshi, IAS, Commissioner & Secretary ka tnad Social Welfare ula pyntip halor ki 10 snem jong ka BBBP Scheme ha Meghalaya bad kumno kala kyntiew ia ka pule puthi, ki lad synshar khadar bad ka jingiatylli ha ka imlang sahlang na ka bynta ki kynthei bad ki khynnah kynthei.
Ula ai jingiaroh ia ki 16 ngut ki briew bad ki SHG kiba la shah pynkup burom na ka bynta ka jingnoh synñiang kaba kyrpang bad jingtrei shitom jongki.
Ha kane ka sngi la pynlong ruh ia ka ‘panel discussion’ halor ka phang “Evolution of Matrilineality: Women in Leadership,” bad la pyniaid ia kane da ka Kong Patricia Mukhim, Editor-in-Chief, The Shillong Times bad ka jingiakren kaba ar pat kala long halor ka phang, “Empowered Women, Empowering Economies,” ia kaba la pyniaid da ka Kong Ibankyntiew Mawrie, Editor, 4front Media.
