Shillong, Naiwieng 25: Ka ophis Indian Audit and Accounts Department (IAAD) kaba don ha Shillong, kala rakhe ia ka Audit Diwas kaba lai, da kaba pynlong ia ki prokram naduh ka 16 tarik haduh ka 24 tarik u Naiwieng 2023.
Kum shi bynta jong katei ka jingrakhe la pynlong ia ka ‘Panel Discussion’ halor ka phang “Strengthening the Functioning and Oversight of Local Governance Institutions in Meghalaya” ha ka 22 tarik u Naiwieng ha kaba la ioh ia ka jingkren na ka Kong Patricia Mukhim, kaba long ka Editor jong u Shillong Times bad u Prof S. Umdor, Head, Economics Department, North Eastern Hill University Shillong.
Katba ha ka 24 tarik u Naiwieng la pynlong ka Inter College Quiz Competition bad ka Seminar halor ka phang “Enhancing Accountability through Geo-spatial Technology” ha ryngkat ka jingiatreilang bad ka North Eastern Space Applications Centre (NESAC).
Kum ban shu kdew, ka President jong ka India kala plié paidbah ia ka jingrakhe ia ka Audit Diwas kaba lai ha kylleng ka ri ha ka 16 tarik u Naiwieng 2023 ha ka ophis CAG of India, New Delhi bad ka jingrakhe ia ka Audit Diwas 2023 ka long kum ka dak jong ka histori bad ka jinghiar pateng jong ka kynhun Audit ba halor tam jong ka India.
Ha ka sngi ba khatduh jong kane ka jingrakhe kaba shi taiew, kala long ha ophis jong u Pr Accountant General (A&E), Meghalaya Shillong ha ka 24 tarik u Naiwieng 2023 ha kaba u Bah C H Kharshiing, Pr Accountant General (A&E) bad ka Shefali S Andaleeb Pr Accountant General (Audit) & Director Genaral, Regional Capacity Building and Knowledge Institute Shillong kila ai jingkren shaphang ka jinglong kyrpang jong kane ka prokram bad ka bynta jong ki kynhun ka CAG ban wanrah jingbahkhlieh katkum ka kamram jong ka kumba la batai ha ka Riti Synshar jong ka ri.
Ha ka jingai jingkren shaphang ka bynta jong ka Teknoloji Haw Haw na ka bynta ka roi ka par jong ka thain shatei lammihngi, u Dr S.P. Aggarwal, Director, NESAC ula kren shaphang ki jingjam shakhmat jong ka Indian Space Research Organisation ban pynkylla ia ka India sha kawei na ki ri ba hakhmat tam ha kine ki kam bad ula batai ruh shapahang ki lad ki lynti kiba don ha ka jingpyndonkam ia ka spatial teknoloji ban pynkhlain shuh shuh ia ki kam Audit.
Ha ka Inter-College Quiz Competition ka St Anthony’s College ba la mihkhmat da ka Christina Themsingphi A.S. bad u Debashish Kakati kila long ki lahduh, ka K.L Bajoria College ba la mihkhmat da u Dondor Nongrum bad Kenneth Lalringlien kila wan baar katba u Marbiangdor Syiem bad Aiborlang Marbaniang jongka Shillong Law College kila wan ba lai.
