Nongpoh, Naiwieng 14: Ka CHILDLINE, Nongpoh kaba hap hapoh ka jingkhmih jong ka Bosco Integrated Development Society, hynne ka sngi nyngkong, ka la rakhe iaka sngi jong ki heprit ne Children’s Day da kaba pynlong ia ka prokram ha ka skul jong ka RBP Synod Secondary School, Bhoirymbong.
Ia kane ka jingrakhe la pynshongkun da ka jingiadon ryngkat u MLA ka Umroi bah George Lyngdoh kum u Kongsan, u Rev. D. R Suting, ka kong Deity Kordor Lyngba Center Coordinator ka Childline Nongpoh, Damiyo Lamare, Nonghikai ka UCC, Ki nonghikai jong katei la skul, ki Kmie ki kpa ha ryngkat ki heprit kiba pule ha katei ka skul.
Haba ai jingkren, u bah George Lyngdoh MLA, u la pynpaw iaka jingsngew kmen kaba khraw iaka ophis Childline ba ka la pynlong ia kane ka jingrakhe kaba kyrpang na ka bynta ki hep kiba rit bad pynpaw ruh iaka jingsngew nguh kaba khraw iaka Synod, ki Pastor bad ia baroh ki nongia donbynta ha kaba ki la lah ban pynwan dur ia kane ka skul RBP Synod Secondary school naduh u snem 2002 haduh mynta.
Ula pynpaw ruh iaka jingsngew kmen kaba khraw ha kaba kane ka skul ka la lah shisha ban ai iaka jingshakri kaba bha tam na ka bynta ki longïing kiba bun bad khatam iaki longïing kiba duk ki bym lah ban kot bor ban phah skul iaki khun.
Ha kane ka jingrakhe la pynlong ia ki jingiakop ialehkai bapher bapher ban pynbyrngia ia ki heprit ha kaba la ioh ruh ban sam iaki khusnam sha ki nongjop bad ha katei ka sngi la ioh ruh ban ai jinghikai iaki khynnah kiba la kham heh ha kaba iadei bad ka career guidance.
