Shillong, Nohprah 25 : Ka Bharatiya Janata Party (BJP) hynne ka sngi Ba-ar, kala rakhe ia ka ‘Good Governance Day’ bad ka ‘Veer Bal Diwas’ ha Nongbahah Shillong kum ka jingkynmaw ia ka jinglyngkhuh sngi kha jong u Myntri Rangbah duh barim ka Ri u Atal Bihari Vajpayee.
Ka BJP kala rakhe ruh ia ka ‘Veer Bal Diwas’ kum ka jingkynmaw burom ia ka jinglen ladi u Zorawar Singh bad Fateh Singh, kiba dei ki Khun jong u Guru Govind Singh.
Ia ka Veer Bal Diwas la pynlong lang da ka BJP Meghalaya Mahola Morcha bad ka BJYM.
Haba kren ha ka jingialang , ka President ka Mahila Morcha Sukhu Pariat kala ong “Mynta ka sngi ngi rakhe ia ka Veer Bal Diwas ban phaidien ia ka histori da ka jingsngew sarong bad jingsngewnguh ia ki longshuwa bad ban peit ia ka lawei da ka jingkyrmen ka jingsngewskhem bad ka jingkhlain”.
Kala ong “ka thong jong ka Ri India kaba khlain kala urlong mynta hapoh ka jingialam jong u Myntri Rangbah Duh ka Ri Narendra Modi bad ngi dei ban long kiba la pynkhreh ha kaban synniang ha kaban pynlong ia ka Ri kaba khlain bad kaba kiew shakhmat”.
U President ka BJYM Mewakar Lyngdoh ula kyntu ia ki samla kiba la ngop ha u droks ba ki dei ban iakhun pyrshah da ka jingshlur haba pynpaw ba ka BJYM ka don hangne ban ai jingkyrshan ia ki ba kin lait noh na u kynjri ba shah the shah khun.
Ha ka jingialang ban rakhe ia ka Good Governance Day, ki riew pawkhmat bad ki nongialam ka Party kynthup u Myntri Sorkar Bah AL Hek, u Nongaiktien Bah Mariahom Kharkrang, ki National Council Member Bah David Kharsati bad Dr Fenella Lyngdoh Nonglait kila ai ka jingkren.
U Bah Hek ula kren halor ka matpdeng jong ka jingialang G20 bad ong “Kawei ka Pyrthei, Kawei ka Longiing, kawei ka Lawei ka thew sha ka jingmut jong ka Good Governance (synshar khadar kaba bha).
U Bah Kharkrang ula kren ba kumno ka Good Governance (synshar khadar kaba bha) kam shong eh tang ha ki Nongtrei Sorkar hynrei ka dei kaba hap iashimbynta da baroh ki nongshongshnong ban pynthikna ia ka Ri India kaba kiew bad ka Ri India kaba khuid.
Haba kut ka prokram, ka Mahila Morcha kala ialam kai ia ki Khynnah ban leit jngoh ia ka Gurudwara.
