Shillong, K’lyngkot 15 : U Myntri Rangbah ka Jylla Conrad K Sangma ha ka sngi Palei, ula pyntip ia ki rai ba un leh ha une u snem ba thymmai, haba buh hakhmat ia ka jingkhuid jingsuba ha kylleng ka Jylla.
“Nga la kut jingmut bha mynta u snem ban pynleit jingmut shisha ha ka jingkhuid jingsuba hapoh ka Jylla baroh kawei” ula ong, haba ban jur ia ka jingkongsan ban pyni ia ka dur ka dar ka jinglehkhuid ha Jylla khamtam ba ka National Games kala nang jan.
“Haba ki briew ki wan ki dei ban khmih ia ka Shillong, Tura, Jowai bad ka Jylla baroh kawei kum ki jaka ba lehkhuid bad ki briew ba sumar ia ka mariang bad kine kiei kiei ki dei kiba nga kwah ban leh. Kumta ngin pyniaid ia baroh ki kam, ki jingdon jingem bad kumjuh ruh ki kynhun ba don bynta ba kin kham aiti bad trei kham bniah khnang ba ngin kot sha ka thong. Nga tip kam kan yn long kaba suk, hynrei ngin sa leh ia kata”.
U Conrad ula kren ruh ia ka jingkut jingmut jong u ban pynbeit noh ia baroh ki kam ba sahteng, kum ki jingeh ba iadei bad ki nonghikai Adhoc bad SSA.
“Nga ju kwah bha ban wad ia ki lad ki lynti ban pynbeit ia kiei kiei baroh….Nga kmen ba ngi la lah ban pynbeit ia kane ha u snem bala lah” ula ong haba bynrap ba ka jingpyntreikam ia ka rukom siew tulop bala pynbeit ryntih ia palat 23000 ngut ki nonghikai Adhoc bad SSA kan sa urlong ha u bnai Iaiong.
U Myntri Rangbah ula kren ruh halor ka rai ba iadei bad ka scholarship ki khynnah pule bad kiwei kiwei.
